Frantsııanyń ońtústigindegi orman órti Parıjdiń kólemindeı jerdi sharpydy

ASTANA. KAZINFORM – Frantsııanyń ońtústiginde osy jazdaǵy eń iri orman órti tirkeldi. Bılik ókilderi ony buryn-sońdy bolmaǵan apat dep baǵalady, jazady France 24.

Jerorta teńizi óńirinde, Ispanııa shekarasyna jaqyn ornalasqan Od departamentinde, sharap óndirisimen tanymal aımaqta orman órti jyldam tarap jatyr. Órt saldarynan bir adam qaza tapty, taǵy 13 adam, onyń ishinde 11 órt sóndirýshi jaraqat aldy. Bastapqyda habar-osharsyz ketti dep sanalǵan bir adam tabylyp, aman-esen ekeni anyqtaldy.

Jergilikti bıliktiń málimetinshe, órt 13 myń gektardan astam aýmaqty sharpyǵan, bul Parıjdiń aýmaǵynan áldeqaıda úlken. Kúnniń ystyq, qurǵaq ári jeldi bolýy órt sóndirýdi qıyndatyp otyr.

Frantsııanyń Premer-mınıstri Fransýa Baırý sársenbi kúni Sen-Loran-de-la-Kabrerıss eldi mekenindegi órt sóndirý shtabyna baryp, órt sóndirýshilermen jáne jergilikti turǵyndarmen kezdesti.

Qorshaǵan orta mınıstrliginiń habarlaýynsha, osy aıda Od aımaǵynda qurǵaqshylyq baıqalyp otyr, osyǵan baılanysty sý paıdalanýǵa shekteýler engizilgen. Sońǵy aılarda jaýyn-shashynnyń bolmaýy órttiń taralýyna sebep boldy.

Bul — jaz mezgilindegi Frantsııadaǵy eń iri orman órti. Elde osy ýaqytqa deıin shamamen 9000 órt tirkelgen, olardyń basym bóligi Jerorta teńizi jaǵalaýynda bolǵan.

Osy jazda Ońtústik Eýropada birneshe iri órt boldy. Ǵalymdar klımattyń ózgerýi ystyqtyń jáne qurǵaqshylyqtyń jıiligi bul óńirdi orman órtterine osal etetinin eskertedi.

Eýropalyq Odaqtyń klımat ózgerisin baqylaý qyzmeti «Kopernık» derekterine sáıkes, Eýropa — álemde eń jyldam jylıtyn qurlyq. 1980-jyldardan beri bul aımaqta temperatýra ortasha álemdik kórsetkishten eki ese jyldam kóterilip keledi.

Osyǵan deıin Frantsııada sońǵy 76 jyldaǵy eń iri orman órti tirkelgeni týraly jazdyq.