Frantsııanyń ońtústiginde taǵy 225 gektar orman órtke orandy
ASTANA. KAZINFORM – Frantsııanyń ońtústigindegi Od departamentinde jalǵasyp jatqan orman órti saldarynan 225 gektar jer órtendi. Bul týraly Anadolý agenttigi jazdy.
Od prefektýrasynyń málimetinshe, órt bir kún buryn jergilikti ýaqytpen saǵat 16:00 shamasynda Pıýıloran kommýnasynyń mańynda tutanǵan.
Tilsiz jaýmen kúresýge birneshe departamentten 350 órt sóndirýshi, 100 tehnıka, tikushaq pen órt sóndirý ushaǵy jumyldyryldy.
Túnde aýa raıy qolaıly bolǵanymen, órtti ázirge baqylaýǵa alý múmkin bolmaı otyr.
Qazirgi ýaqytta órt 225 gektar aýmaqty sharpyǵan.
Bılik kúndiz kútiletin aptap ystyq órt sóndirýshilerdiń jumysyn qıyndatýy múmkin ekenin eskertti.
Od departamentiniń prefekti Alen Bıýke turǵyndardy órt oshaǵyna jaqyndamaýǵa jáne órt sóndirýshiler men jandarmerııa qyzmetkerleriniń nusqaýlaryn oryndaýǵa shaqyrdy.
Órttiń shyǵý sebebi ázirge anyqtalǵan joq.
Aıta keteıik, 5 qyrkúıekte Qazaqstannyń úsh oblysynda orman órti tirkelgeni habarlandy.
Al Aljırde orman órtinen 12 adam qaza taýyp, úsh kúndik aza tutý jarııalandy.
