Frantsııanyń ońtústiginde orman órti qaýpiniń eń joǵary deńgeıi jarııalandy
ASTANA. KAZINFORM – Frantsııanyń ońtústigindegi alty departamentte aptap ystyq saldarynan orman órti qaýpi kúsheıip, eń joǵary – «qyzyl» qaýip deńgeıi jarııalandy, dep habarlaıdy Anadolu.
Frantsııanyń Meteo-France meteorologııalyq qyzmetiniń málimetinshe, taǵy úsh departamentte – Ardesh, Drom jáne Varda «qyzǵylt sary» qaýip deńgeıi engizilgen.
Frantsııanyń Ulttyq órt sóndirýshiler federatsııasynyń ókili Davıd Annoteldiń aıtýynsha, jaz maýsymy endi bastalǵanyna qaramastan, orman órtiniń qaýpi alańdaýshylyq týǵyzyp otyr.
«Orman órtteriniń árbir toǵyzynshysy adamnyń kinásinen bolady. Sondyqtan turǵyndardy prefektýralardyń talaptaryn saqtaýǵa, ormanda temeki shekpeýge jáne mangaldy tek beton alańdarda paıdalanýǵa shaqyramyz», – dedi Davıd Annotel.
Onyń aıtýynsha, qazirgi tańda órt sóndirý qyzmetiniń tehnıkasy men jeke quramyna túsetin júkteme aıtarlyqtaı artqan. Sonymen qatar aldaǵy eki aı boıy osyndaı jaǵdaıda jumys isteýge týra keledi.
Annotel qazirgi aýa raıy órt qaýpin kúsheıtip otyrǵanyn aıtty. Onyń málimetinshe, jeldiń jyldamdyǵy saǵatyna 30 shaqyrymǵa jetip, aýa ylǵaldylyǵy 30 paıyzdan tómendegen, al temperatýra 30 gradýstan joǵary saqtalyp tur.
Aıta keteıik, Frantsııada aptap ystyq saldarynan ólim-jitim myń jaǵdaıǵa artty.
