Frantsııanyń memlekettik qaryzy elge qaýip tóndirýi múmkin
ASTANA. KAZINFORM — Frantsııanyń Esep palatasynyń tóraǵasy Amelı de Monshalen memlekettik qaryzǵa qyzmet kórsetý qunynyń odan ári ósýi eldiń egemendigine qaýip tóndirýi múmkin ekenin eskertti, dep habarlaıdy Euronews.
Amelı de Monshalen Le Parisien basylymyna bergen suhbatynda Frantsııa besinshi respýblıkanyń tarıhyndaǵy eń mańyzdy sheshimderdiń birin qabyldaý aldynda turǵanyn aıtty. Ol memlekettik qarjyny turaqtandyrý úshin bılikti múmkindiginshe tez arada shara qabyldaýǵa shaqyrdy.
Esep palatasy basshysynyń baǵalaýynsha, 2026 jyly memlekettik qaryz boıynsha paıyz tóleýge shamamen 80 mlrd eýro jumsalady. Bul Frantsııanyń Ulttyq bilim mınıstrliginiń 65 mlrd eýro kólemindegi bıýdjetinen kóp jáne qorǵanys shyǵyndarynan shamamen 40%-ǵa joǵary.
De Monshalenniń aıtýynsha, qaryz boıynsha paıyz tóleý shyǵyndarynyń ósýi memlekettiń múmkindikterin shektep, eldiń egemendigine qaýip tóndirýi múmkin.
Ol sondaı-aq Frantsııanyń memlekettik qaryzy 2025 jyly rekordtyq deńgeıge jetkenin atap ótti. Frantsııanyń Ulttyq statıstıka jáne ekonomıkalyq zertteýler ınstıtýtynyń (Insee) málimetinshe, byltyrǵy jyldyń sońynda memlekettik qaryz kólemi 3,46 trln eýroǵa nemese ishki jalpy ónimniń 115,7%-yna jetti. Bir jyl buryn bul kórsetkish 112,6% bolǵan.
2026 jyldyń birinshi toqsanynda memlekettik qaryz kólemi 3,536 trln eýroǵa jetip, onyń ІJÓ-ge shaqqandaǵy úlesi 117,5%-ǵa deıin ósti.
Sonymen qatar de Monshalen qaryz kóleminiń odan ári ósýi mindetti túrde jalǵasady degen pikirmen kelispeıdi. Ol Germanııa, Italııa jáne Portýgalııany mysalǵa keltirip, bul elderdiń buǵan deıin qaryz júktemesin turaqtandyra alǵanyn aıtty.
— Eger sheshimder tez ári jaýapkershilikpen qabyldansa, Frantsııa úshin jaǵdaıdy ózgertýge múmkindik bar, — dedi Esep palatasynyń tóraǵasy.
Insee málimetinshe, 2025 jyly Frantsııa bıýdjetiniń tapshylyǵy ІJÓ-niń 5,1%-yn, al memlekettik qaryz 115,7% boldy. 2026 jyldyń birinshi toqsanynda qaryz júktemesi taǵy 1,8 paıyzdyq tarmaqqa ósip, ІJÓ-niń 117,5%-yna jetti.
Bir apta buryn Qyrǵyzstannyń qazirgi memlekettik qaryzy qansha ekenin jarııaladyq.
