Frantsııanyń kıberqylmys týraly zańy tehnologııalyq jetekshilerge, sonyń ishinde Pavel Dýrovqa baǵyttalǵan

ASTANA. KAZINFORM – Frantsııa bıligi zańsyz qyzmetke yqpal etetin tehnologııalyq kompanııalardyń basshylaryna qarsy baǵyttalǵan jańa zań qabyldaý arqyly mańyzdy qadam jasady.

2023 jyldyń qańtarynda kúshine engen bul jańashyldyq Frantsııany kıberqylmyspen kúreste kóshbasshy etpek. Zańǵa sáıkes, tehnologııalyq kompanııalardyń basshylary ózderiniń platformalary arqyly jasalǵan qylmystar úshin jaýapqa tartylýy múmkin. Olardyń qatarynda Telegram bas dırektory Pavel Dýrov ta bar.

Frantsııada Dýrovqa qatysty resmı tergeý bastalǵany belgili. Ol 10 jylǵa bas bostandyǵynan aıyrylyp, €500,000 aıyppul tóleýi múmkin. Dýrov Telegram Eýropalyq Odaqtyń zańdaryn saqtaıtynyn alǵa tartyp, aıyptaýdan bas tartqan edi.

«Lopmi (Loi d 'Orientation et de Programmation du Ministère de l' Intérieur) 2023-22» dep atalatyn zań buryn-sońdy bolmaǵan, sáıkesinshe sotta qarastyrylǵan da joq. Osylaısha, Frantsııa tehnologııalyq kompanııalardyń basshylaryn jaýapqa tartqan alǵashqy el boldy.

GIP Digital Watch Observatory komandasynyń aıtýynsha, Іshki ister mınıstrligine arnalǵan Lopmi Zańy adamı, zańdy jáne bıýdjettik resýrstardy arttyrý arqyly bolashaq qaýipsizdik máselelerin sheshý úshin bes jylǵa €500 000 qarajatqa teń jospar usynady.

Zań tsıfrlyq transformatsııa arqyly jumysty jańǵyrtýǵa baǵyttalǵan. Bıýdjettiń jartysyna jýyǵy qyzmetterdi tsıfrlandyrýǵa, tergeý quraldaryn jańǵyrtýǵa jáne kıberqylmysqa qarsy is-qımyldy jaqsartýǵa bólingen.

Sondaı-aq, 8500 jańa jumys ornyn qurý, qyzmetkerlerdi jaldaý kezinde ártúrlilikti jaqsartý, 2030 jylǵa qaraı polıtsııa men jandarmerııanyń qatysýyn eki esege arttyrý josparlanyp otyr.

Zań daǵdarystardy basqarýǵa, ásirese, azamattyq qaýipsizdik pen klımattyq oqıǵalarǵa, sondaı-aq iri halyqaralyq is-sharalarda qoǵamdyq tártipti nyǵaıtýǵa basa nazar aýdarady. Sonymen qatar, ozyq tehnologııalar men yntymaqtastyqty qoldana otyryp, shekara qaýipsizdigin jaqsartýǵa baǵyttalǵan.

Zańgerler AQSh-ta nemese basqa Batys elderinde uqsas zańdar joq ekenin atap ótti.

«AQSh zańnamasynda munyń tikeleı analogy joq jáne men Batys áleminde mundaı zańdardy bilmeımin», - dedi AQSh Bas prokýrorynyń kómekshisiniń burynǵy orynbasary Adam Hıkkı Reuters agenttigine.

Qazir AQSh-tyń Mayer Brown zań fırmasynda jumys isteıtin Hıkkı amerıkalyq prokýrorlar tehnologııalyq kompanııanyń basshysyn «paıdalanýshylar jasaǵan qylmystarǵa qatysýshy nemese kómekshi» dep aıyptaýy múmkin ekenin túsindirdi. Biraq «operator óz paıdalanýshylaryna qylmystyq áreketterdi jasaýǵa nıetti jáne olardyń jasalýyna yqpal etedi» degen dálelder bolsa ǵana aıypqa ilikpek.

Ol 2015 jyly aıyptalǵan Ross Ýlbrıhty mysalǵa keltirdi. Onyń Silk Road saıty esirtki satatyn alań bolyp shyqqan-dy. AQSh prokýrorlary Ýlbrıht «Silk Road-ty quqyq qorǵaý organdarynyń qoly jetpeıtin onlaın-qylmystyq naryq retinde ádeıi basqardy» dep málimdedi. Osylaısha, Ýlbrıht ómir boıyna bas bostandyǵynan aıyryldy.

AQSh-ta qylmystarǵa belsendi atsalysqan Ýlbrıht sııaqty adamdardyń izine túsip júrse, frantsýz Zańy platforma operatorlaryn óz saıttaryndaǵy zańsyz áreketteri úshin, tipti tikeleı qatysýynsyz-aq jaýapqa tartýǵa baǵyttalǵan.

Lor Bekko bastaǵan Parıj prokýrorlary bul zańdy uıymdasqan kıberqylmyspen kúresýdiń mańyzdy quraly retinde baǵalap otyr. Onyń ishinde balalardy qanaý jáne nesıelik kartalarmen alaıaqtyq operatsııalar da bar. Jaqynda Dýrovtyń tutqyndalýy jáne Coco sııaqty platformalardyń jabylýy Frantsııanyń ınternettegi qylmysqa qatysty qatań ustanymyn kórsetedi. Dýrovtyń isimen aınalysyp jatqan J3 bólimi basqa da iri isterdi, sonyń ishinde Coco forýmy arqyly jasalǵan Domınık Pellıkonyń qylmystaryn da zerttedi.

Zańnyń áleýetine qaramastan, zańdyq qıyndyqtar týyndaýy múmkin. Degenmen, bul jahandyq kıberqylmyspen kúreste alǵa jasalǵan mańyzdy qadam ekeni anyq.

Aıta keteıik, buǵan deıin Telegram messendjeriniń negizin qalaýshy Pavel Dýrov Frantsııanyń quqyq qorǵaý organdarymen baılanys ornatyp, Telegram qoldanýshylary týraly jeke basyna qatysty málimetterdi anyqtaıtyn aqparatty bere bastaǵanyn jazǵan edik.

Sondaı-aq Telegram negizin qalaýshy Pavel Dýrov Frantsııada ustalýyna qatysty alǵash ret túsinikteme bergen edi.