Frantsııanyń eń iri medıaholdıngi Qazaqstandy jańa qysqy maýsymda kórsetedi
ASTANA. KAZINFORM – Frantsııanyń M6 telearnasyndaǵy áıgili Pekin Express trevel-jobasynyń jańa maýsymy bastaldy. Bıylǵy maýsym tolyqtaı Qazaqstan aýmaǵynda túsirilip, elimizge arnalyp otyr.
Joba tarıhynda bir ǵana elde tolyq túsirilgen maýsym az bolǵan. Endi sol qatarǵa Qazaqstan da enip otyr. Ádette túsirilim toby bir maýsymda birneshe eldi qamtýǵa tyrysady. Bul joly avtorlar Qazaqstanǵa erekshe qyzyǵýshylyq tanytyp, elimizdiń týrıstik áleýetine nazar aýdarǵan.
«Pekın Ekspress» shoýynyń 21 jylynda túsirilim alǵash ret qysta ótti. Bul maýsym «Muz joly» dep atalady. Qazaqstan — shoýdyń búkil tarıhynda tutas maýsym tek bir elde túsirilgen úshinshi memleket. Ádette túsirilim birneshe elde ótedi», — dep bólisti jobanyń jergilikti prodıýseri Janar Nurlybek.
Baǵdarlamanyń ortasha táýliktik aýdıtorııasy 3,5 mıllıon kórermenge jetedi. Al jarnamalyq naýqan kezinde jańa maýsym Frantsııa men halyqaralyq aýdıtorııanyń nazaryn aýdaryp, M6 telearnasy men Pekin Express jobasynyń resmı paraqshalarynda jarııalanǵan rolıkter mıllıondaǵan qaralym jınaǵan.
Qysqy maýsym kórermen tarapynan joǵary qyzyǵýshylyqqa ıe bolady dep kútilýde. Boljam boıynsha Frantsııa, Belgııa, Monako jáne Shveıtsarııada kórermen sany 7 mıllıonǵa deıin jetýi múmkin.
Frantsııada Pekin Express baǵdarlamasy týrıstik tańdaýlarǵa áser etetin eń yqpaldy medıa ónimderdiń qataryna jatady. Halyqaralyq taldaýlarǵa sáıkes, kez kelgen elde túsirilgen maýsym efırge shyqqannan keıin Frantsııadan sol memleketke baratyn týrıster aǵyny keminde 15%-ǵa artady. Bul Qazaqstandy Eýropa naryǵynda ilgeriletýge qosymsha múmkindik beredi.
Pekin Express jobasynyń qysqy maýsymy Qazaqstannyń halyqaralyq týrıstik ımıdjin nyǵaıtýǵa jáne jańa týrısterdi tartýǵa mańyzdy úles qosady.
Aıta keteıik, Almaty Dúnıejúzilik týrıstik alıanstyń tolyqqandy múshesi atandy.