Frantsııanyń eks-prezıdenti Nıkolıa Sarkozı túrmede kitap jazýdy qolǵa aldy

ASTANA. KAZINFORM – Frantsııanyń burynǵy prezıdenti, 2007–2012 jyldar aralyǵynda eldi basqarǵan Nıkolıa Sarkozı túrmege túsken alǵashqy kúninde-aq kitap jazýǵa kirisken, dep habarlaıdy Kazinform agenttigi TASS-qa silteme jasap.

Bul týraly onyń advokaty Jan-Mıshel Darrýa málimdedi. Qorǵaýshynyń aıtýynsha, Sarkozı aýmaǵy 9 sharshy metrdi quraıtyn jeke kameraǵa ornalastyrylǵan.

Jan-Mıshel Darrýa kamerada únemi túrli shý estilip turatynyn aıtqan. Degenmen eks-prezıdent sportpen aınalysyp, tipti kitap jazýdy da bastap, túrmedegi alǵashqy kúnin tıimdi ótkizgen. Kúnniń ekinshi jartysynda ol áıeli, ánshi Karla Brýnımen kezdesti.

«Túrmedegi alǵashqy kún qashanda qıyn, biraq ol bul synaqtan súrinbeı ótti», dedi Darrýa.

Eske salaıyq, Parıj soty Frantsııanyń eks-prezıdenti Nıkolıa Sarkozıdi 2007 jylǵy saılaýaldy kampanııasyn Lıvııa rejıminiń qarjylandyrǵany boıynsha qylmystyq sóz baılasý jasady dep tanyp, ony 5 jylǵa bas bostandyǵynan aıyrýǵa úkim shyǵarǵan.

Sot otyrysyn júrgizgen Natalı Gavarıno Sarkozı, sol kezdegi kandıdat retinde, jaqyn serikterine Lıvııadan qarjylaı qoldaý alý úshin áreket etýge múmkindik bergenin atap ótti. Eks-prezıdentke passıvti jemqorlyq, saılaýaldy kampanııany zańsyz qarjylandyrý, memlekettik qarajatty maqsatsyz jumsaý jáne qylmystyq toppen baılanys ornatý baptary boıynsha aıyp taǵylǵan.

21 qazanda Nıkolıa Sarkozı jazasyn óteý úshin Sante túrmesine jetkizilgen edi.

Aıta keteıik, Frantsııanyń eks-prezıdenti Nıkolıa Sarkozı bes jylǵa bas bostandyǵynan aıyryldy.