Frantsııanyń eks-prezıdenti Nıkolıa Sarkozı túrmede arnaıy kúzetke alyndy

ASTANA. KAZINFORM – Frantsııanyń burynǵy prezıdenti Nıkolıa Sarkozı Parıjdegi Sante túrmesinde arnaıy kúzetke alyndy. Ony qorǵaý úshin eki polıtseı kórshi kamerada kezekshilik atqaryp otyr, dep habarlaıdy DW.

Eldiń ishki ister mınıstri Loran Nýnes málimdegendeı, eks-prezıdent respýblıka basshysy bolǵan mártebesine baılanysty jeke qaýipsizdik quqyǵyna ıe.

«Ol qazir kúzette jáne oǵan qaýip tónýi múmkin. Sondyqtan qosymsha qorǵaý sharalary qarastyryldy», – dedi mınıstr.

Nýnestiń aıtýynsha, kórshi kamerada Sarkozıdi qorǵaýǵa jaýapty eki polıtsııa qyzmetkeri turaqty túrde kezekshilik etedi. Bul sheshim túrme ákimshiligimen kelisilgen.

Alaıda túrme qyzmetkerleri kásipodaǵy bul sheshimdi synǵa aldy.

«Bul – bizdiń óz jumysymyzdy atqara almaı otyrǵanymyz sekildi áser qaldyrady. 25 jyldyq tájirıbemde mundaı jaǵdaıdy kórmeppin», – dedi kásipodaq ókili Vılfrıd Fonk RTL telearnasyna bergen suhbatynda.

BFM TV arnasynyń habarlaýynsha, Sarkozıdiń qasynda áli de eki hatshysy jumys isteıdi: olar burynǵy prezıdenttiń hattaryn suryptap, telefon qońyraýlaryna jaýap beredi.

Advokatynyń aıtýynsha, Sante túrmesinde tutqyndar jeke kameralarda ustalady jáne serýen kezinde bólek júredi, ıaǵnı Sarkozı basqa sottalǵandarmen baılanysqa shyqpaıdy. Ádette as taratý mindetin sottalǵandardyń biri oryndaıdy, biraq Sarkozı úshin erekshe jaǵdaı jasalǵan – onyń asyn túrme qyzmetkeri ákeledi.

Burynǵy prezıdenttiń kamerasy 9 sharshy metr, al jaǵdaıy qarapaıym. 70 jastaǵy saıasatkerge kúnine bir saǵat serýendeýge jáne aptasyna úsh ret kelýshilerdi qabyldaýǵa ruqsat berilgen.

Advokatynyń sózinshe, ol túrmede sportpen aınalysyp, jańa kitap jazýdy josparlap otyr.

Eske salsaq, buǵan deıin Nıkolıa Sarkozı Parıjdegi Sante túrmesine jetkizilip, onda 5 jylǵa bas bostandyǵynan aıyrý jazasyn óteýdi bastaǵan bolatyn.