Frantsııanyń eks-prezıdenti Nıkolıa Sarkozı bes jylǵa bas bostandyǵynan aıyryldy

ASTANA. KAZINFORM — Frantsııanyń burynǵy prezıdenti Nıkolıa Sarkozı «lıvııalyq qarjylandyrý» isi boıynsha qylmystyq top qurdy dep tanylyp, bes jylǵa túrmege kesildi. Bul týraly sársenbi kúni Parıj sotynyń sheshimine silteme jasap frantsýz BAQ-tary habarlady, dep jazdy Anadoly.

Sarkozıge qatysty tergeý barysynda tórt aıyp qaraldy: passıvti sybaılas jemqorlyq, memlekettik qarajatty ıemdený, saılaýaldy naýqandy zańsyz qarjylandyrý jáne qylmystyq top qurý arqyly qylmys jasaý.

Sot Sarkozıdi alǵashqy úsh aıyp boıynsha aqtady, alaıda saılaýaldy naýqandy qarjylandyrý kózderin jasyrý maqsatynda qylmystyq top qurdy degen aıyppen kináli dep tapty.

Buǵan deıin Parıj prokýratýrasy oǵan jeti jyl túrme jazasyn suraǵan bolatyn. Sarkozıdiń ózi on jyldan astam ýaqyt boıy barlyq aıyptaýlardy joqqa shyǵaryp, tergeýdiń saıası astary bar ekenin málimdegen.

Tergeý derekteri boıynsha, Sarkozı 2007 jyly Lıvııanyń sol kezdegi basshysy Mýammar Kaddafıden prezıdenttik naýqanyn qarjylandyrý úshin shamamen 50 mıllıon eýro alǵan. Bul qarajat 2006 jyldyń sońynda nemese 2007 jyldyń basynda berilgen bolýy múmkin.

Atalǵan aıyptaýlar alǵash ret 2013 jyly jarııa bolǵannan keıin aldyn ala tergeý bastalyp, 2018 jylǵy 21 naýryzda Sarkozı Parıjde qamaýǵa alynǵan. Keıin oǵan qatysty qylmystyq is qozǵaldy.

Basty kýáger qaıtys boldy

Іs aıasynda kýáger lıvan-frantsýz kásipkeri Zııad Takıeddınniń aıtqandaryna erekshe nazar aýdaryldy. Ol 2016 jyly Sarkozıge Trıpolıden 5 mıllıon eýro qolma-qol jetkizgenin málimdegen bolatyn. Alaıda keıin, 2020 jyly, ol óz málimdemesinen bas tartty.

2025 jylǵy 23 qyrkúıekte Takıeddın Beırýt qalasynda qaıtys boldy. Frantsýz tergeýshileri Sarkozı oǵan deldaldar arqyly qysym jasaýy múmkin dep kúdiktenip otyr. Tergeý derekteri boıynsha, kýágerdi satyp alýǵa shamamen 608 myń eýro jumsalǵan.

Aıta keteıik, Brazılııanyń eks-prezıdenti Bolsonarý 27 jylǵa sottaldy.