Frantsııanyń agrosektory kúrdeli kezeńge tap boldy
ASTANA. KAZINFORM – Frantsııanyń azyq-túlik qaýipsizdigi jarty ǵasyrda alǵash ret qaýipke ushyrady, dep habarlaıdy Euronews.
Aýyl sharýashylyǵy mınıstri 10 jyldyq azyq-túlik strategııasyn aıqyndaý boıynsha konsýltatsııalardy bastady.
Frantsııanyń azyq-túlik balansy shamamen elý jyldan beri alǵash ret teris kórsetkish kórsetýi múmkin.
Frantsııanyń aýyl sharýashylyǵy mınıstri Annı Jenever «azyq-túlik dabylyn» jarııalady. Parıj janyndaǵy Rýnjı iri kóterme bazarynda ol fermer, kásipker jáne sarapshylarmen búkilulttyq konsýltatsııalardy bastap, aldaǵy onjyldyqqa arnalǵan azyq-túlik strategııasyn ázirleýdi kózdep otyr.
Búginde Frantsııa tutynatyn qoı etiniń 60 paıyzyn, jemis-jıdek, kókónis pen qus etiniń jartysyn, sıyr etiniń 25 paıyzyn ımporttaıdy.
— Frantsııa jaqsy tamaqtaný úshin kóbirek óndirýi kerek, — dedi Jenever.
Mınıstrdiń aıtýynsha, sońǵy jyldary AQSh, Qytaı jáne Reseı aýyl sharýashylyǵyna memlekettik ınvestıtsııany aıtarlyqtaı arttyrsa, Eýropalyq odaq kerisinshe, qysqartqan.
Fermerler kásipodaqtary mınıstrdiń úndeýine jaýap beremiz degenimen, Jeneverdiń de, jalpy frantsýz úkimetiniń de ustanymyn synǵa alyp otyr.
Aýyl sharýashylyǵy qyzmetkerleri «azyq-túlik dabyly» termıniniń ózine-aq narazy.
— Bul sektor uıyqtap jatqandaı áser qaldyrýy múmkin; jaǵdaı múldem basqasha: fermerler eshqashan uıyqtaǵan emes, olar sergek, kóbine jaǵdaıdyń qıyndyǵyna baılanysty ashýly, — dep málimdedi FNSEA kásipodaǵy.
Fermerler qazirgi ahýaldyń baǵanyń ósýi men óndiristiń qysqarýynyń sebepteriniń biri retinde sharýalarǵa júktelgen ekologııalyq shekteýlerdi atap ótti.
Úkimettiń ustanymyn olar qarama-qaıshy dep sıpattaıdy. Bir jaǵynan, Frantsııadaǵy aýyl sharýashylyǵy óndirisiniń jaǵdaıyna alańdaýshylyq bildiredi, al ekinshi jaǵynan, Marokko, Ýkraına, Meksıka, Jańa Zelandııa jáne Merkosýr blogymen jasalǵan saýda kelisimderine «jasyl sham» jaǵyp otyr.
Fermerlerdiń aıtýynsha, bul kelisimder frantsýz ónimderiniń básekege qabilettiligin odan ári tómendetedi.
Aıta ketelik Parıjde Frantsııa úkimetiniń bıýdjet saıasatyna qarsy narazylyq aktsııasy ótti.