Frantsııanyń 49 aımaǵynda aptap ystyqqa baılanysty eń joǵary qaýip deńgeıi engizildi
ASTANA. KAZINFORM — Frantsııa elinde aptap ystyqqa baılanysty 49 ákimshilik aımaqta, onyń ishinde Parıj ben Il-de-Frans óńirinde aýa raıyna qatysty eń joǵary — qyzyl qaýip deńgeıi jarııalandy. Bul týraly TASS habarlady.
Météo-France ulttyq meteoqyzmetiniń málimetinshe, eldiń keıbir óńirlerinde aýa temperatýrasy 42 gradýsqa deıin kóterilýi múmkin.
Mamandardyń aıtýynsha, mundaı deńgeıdegi eskertý Frantsııanyń osynsha kóp aımaǵynda buryn-sońdy qatar jarııalanǵan emes.
Sonymen qatar 40 aımaqta qyzǵylt sary qaýip deńgeıi, taǵy 7 aımaqta sary deńgeı engizildi. Osylaısha Frantsııanyń eýropalyq bóliginiń basym aýmaǵy aptap ystyqqa baılanysty túrli deńgeıdegi eskertý aımaǵyna kirip otyr.
Buǵan deıin Frantsııanyń ulttyq bilim mınıstri Edýar Jeffre joǵary temperatýraǵa baılanysty 845 mekteptiń jabylatynyn málimdegen.
Taǵy 1,8 myń bilim berý mekemesinde sabaq kestesi ózgertiledi. Oqýshylarǵa túske deıin mektepten shyǵý usynylady.
-Aptap ystyq kelesi aptada da saqtalýy nemese tipti kúsheıýi múmkin, — dep habarlady sınoptıkter.
Eske salaıyq, buǵan deıin Frantsııanyń 60 aımaǵynda qyzǵylt sary qaýip deńgeıi jarııalanyp, aýa temperatýrasy 41 gradýsqa deıin kóterilýi múmkin ekeni habarlanǵan edi.
