Frantsııada qalyń qardyń saldarynan joldar jabylyp, reıster keshigip jatyr

ASTANA. KAZINFORM – Sársenbi kúni tańerteń Batys Eýropada qar jaýyp, kólik qozǵalysyna úlken kedergi keltirdi, dep habarlaıdy Kazinform agenttiginiń menshikti tilshisi.

Saǵat 07:00-de Frantsııanyń RATP kólik kompanııasy avtobýstardyń «kem degende túski ýaqytqa deıin» qatynamaıtynyn habarlady. Sebebi «qaýipsizdik jaǵdaılary qalpyna keltirilgenshe» qyzmet toqtatyldy. Bul ereje «Île-de-France Mobilités» kompanııasyna da qatysty. Qala metro jelisi áli kúnge deıin toqtaýsyz jumys istep tur.

Frantsııadaǵy N118 trassasy kóktaıǵaqqa baılanysty eki baǵytta da jabyldy. Jalpy eldegi joldardaǵy jaǵdaı nasharlap barady. Il-de-Frans aımaǵyndaǵy keptelis saǵat 8-ge deıin salystyrmaly túrde az bolsa, keıin kúrt ósti: saǵat 9-da 700 km-den asty, keıin 950 km-ge jetti. Aıta keteıik, rekord dúısenbi kúni tirkelgen — 1019 km.

Qalyń qar Parıjdegi temirjol vokzaldaryna da áser etti. Sen-Lazar vokzalynda Rýandan kelgen TER poıyzy 50 mınýtqa keshigip, Gavrdan kelgen poıyz 1 saǵat 20 mınýtqa keshikti.

Monparnas vokzalynda La-Rochelle baǵytyndaǵy TGV poıyzy qar saldarynan toqtatyldy, Lıon vokzalynda barlyq poıyz kem degende 1 saǵatqa keshiktirildi.

Sársenbi kúni tańerteń qar jaýyp, Sharl-de-Goll áýejaıynda shamamen 100 reıs, al Orlı áýejaıynda 40 reıs toqtatyldy. Kólik mınıstri Fılıpp Tabaro CNews telearnasyna bergen suhbatynda «keshke qaraı jaǵdaı qalypqa kelýi múmkin» degen úmit bildirdi. 

Eske salsaq Eýropadaǵy qalyń qar jaýyp júzdegen áýe reısi toqtatylǵany týraly jazǵan edik.