Frantsııalyq kompanııa Qazaqstanda energetıka baǵytynda kadr daıarlaıtyn keńse ashpaq

ASTANA. KAZINFORM – Búgin Astanada ótken KazAtomExpo halyqaralyq kórmesinde Assystem kompanııasynyń vıtse-prezıdenti Gııom Pıýrave ıadrolyq energetıka salasyn damytýǵa qatysty usynystaryn aıtty.

Frantsııalyq osy kompanııanyń ókili Qazaqstannyń jergilikti mamandaryn daıarlaý baǵytynda Assystem osynda keńse ashýdy josparlap otyrǵanyn jetkizdi.

«Eger Qazaqstanda AES salý jóninde sheshim qabyldansa, naqty qansha maman jumys isteıtinin dál qazir aıtý qıyn. Bul turǵyda AES-ti kimder salatynyn anyqtap alý kerek, sodan keıin kerek mamandardyń sany aıqyndalady. Atap aıtqanda, bastapqyda sheteldik kadrlardyń bolatyny túsinikti jaǵdaı. Degenmen, biz osynda keńse ashýǵa jáne jergilikti mamandardy damytýǵa ekpin qoımaqpyz. Osy oraıda Qazaqstanda myqty mamandardyń sanyn eselep arttyrýǵa nazar aýdarǵan jón», - dedi Gııom Pıýrave.

Onyń aıtýynsha, kez kelgen atom elektr stantsııasyn (AES) salý 10 jyldan asady. Bul nysannyń qurylysyna shamamen 20 myń adamdy tartý qajet. Osy baǵytta myqty mamandar kerek bolady.

«Eń mańyzdy mindet — halyqqa aqparattyń ashyq bolýyn qamtamasyz etý», - dedi ol.

Aıta keteıik, kórme aıasyndaǵy brıfıngide QR Energetıka mınıstrligi Atom energetıkasy jáne ónerkásibi departamentiniń dırektory Ǵumar Serǵazın Atom elektr stantsııasyn (AES) salyp beretin vendorǵa táýeldi bolyp qalmaý úshin ózimizdiń mamandardy daıarlaýǵa ekpin qoıylatynyn aıtty.

Qazaqstanda AES salý máselesine arnalǵan respýblıkalyq referendým týraly Prezıdent Jarlyǵynyń jobasy Úkimet qaraýyna jiberildi.

Búgin Úkimet otyrysynda «Qazaqstannyń atom elektr stansasy» JShS bas dırektory Tımýr Jantıkın AES qurylysyna qatysty short-paraqshaǵa qaı elder kirgenin atady.