Frantsııada «Kıran» daýyly álek salyp jatyr

Sınoptıkterdiń aıtýynsha, «Kıran» daýyly sársenbi kúni keshke eldiń soltústik-batysyna jetken. Bretanniń eki departamenti men Normandııanyń bir departamentinde daýylǵa baılanysty aýa raıy qaýpiniń qyzyl deńgeıi jarııalandy. Kazinform agenttigi bul týraly Euronews-ke silteme jasap habarlaıdy.

Eldiń soltústik-batysynda qatty nóser jaýyn jaýyp, 170 km/saǵ jyldamdyqpen  jel soǵady dep boljanyp otyr – aımaqqa Atlant muhıtynan «Kıran» daýyly jaqyndap keldi. Úsh departamentte aýa raıy qaýpiniń joǵary qyzyl, taǵy 17-sinde qyzǵylt sary deńgeıi jarııalanǵan. Habarlanǵandaı, bul – bıylǵy jyly alǵashqy kúshti kúzgi daýyl.

Meteorologterdiń málimetinshe,  sársenbi kúni keshte bastalǵan daýyl, beısenbige deıin jalǵasady. Frantsııanyń ishki ister mınıstri Jerald Darmanen Bretan men Normandııa turǵyndaryn aldaǵy túni úılerinen shyqpaýǵa, aǵashtar men teńizden alys júrýge shaqyrdy. Daýyl kezinde tolqyn bıiktigi 10 metrge jetedi dep boljanyp otyr.

Teńiz jaǵalaýyndaǵy keıbir joldar jabylady. Sondaı-aq, aımaqtyq jáne qalaaralyq poıyzdardyń qozǵalysy toqtatylady. Jergilikti ýaqyt boıynsha saǵat 17:00-de «Brest Bretan» áýejaıy jabylady, al araldarǵa parom qatynasy toqtatylýy múmkin.

Aımaqta 3200 qutqarýshy men tórt tikushaq jumyldyryldy.