Frantsııadaǵy jattyǵýymyz joǵary deńgeıde ótip jatyr – dzıýdodan ulttyq quramanyń bas bapkeri

ASTANA. KAZINFORM — Dzıýdodan Qazaqstannyń ulttyq quramasy XXXIII jazǵy Olımpıada oıyndaryna sońǵy sheshýshi oqý-jattyǵý jıynyn Frantsııanyń Mez qalasynda ótkizip jatyr. 

Bul týraly Kazinform tilshisine Ulttyq quramanyń bas bapkeri Nurbol Súleımenov aıtyp berdi.

«Qazir Olımpıadaǵa sońǵy oqý-jattyǵý jıyndaryn Frantsııanyń Mez qalasynda ótkizip jatyrmyz. Jattyǵý óte joǵary deńgeıde ótip jatyr. Bul qala bizge burynnan tanys. Osydan birer jyl buryn dál osy qalada bizdiń komanda taǵy da jattyǵý jıynyn uıymdastyrǵan bolatyn. Qaladaǵy jattyǵý zalynda barlyq jaǵdaı jasalǵan. Buıyrsa, Parıjdegi Olımpıada qalashyǵyna 25 shilde kúni oralamyz. 26 shildede oıyndardyń ashylý saltanaty ótedi. Al 27 shilde kúni birinshi bolyp bizdiń dzıýdoshylar júldege talasady», - dedi bas bapker. 

Aıta keteıik, Olımpıadanyń alǵashqy jarys kúni el namysyn tájirıbeli Eldos Smetov (60 kg) pen Abıba Ábýjaqynova (48 kg) qorǵaıdy. Osydan keıin Esmıgýl Kýıýlova (63 kg), Kamıla Berlikash (+78 kg), Ǵusman Qyrǵyzbaev (66 kg), Danııar Shamshaev (73 kg), Abylaıhan Jubanazar (81 kg), Nurlyhan Sharhan (100 kg) synǵa túsedi.

Frantsııa astanasyndaǵy oıyndar 26 shildede bastalyp, 11 tamyzda máresine jetedi.