Frantsııadaǵy jappaı tártipsizdik shyǵyny 1,2 mlrd eýroǵa jetýi múmkin
ASTANA. KAZINFORM — Ótken demalys kúnderi Frantsııada bolǵan jappaı tártipsizdikter saqtandyrý tólemderiniń mólsheri jaǵynan eldegi eń iri oqıǵalardyń biri bolmaq, dep habarlaıdy Kazinform agenttiginiń menshikti tilshisi Financial Times basylymyna silteme jasap.
Qarjy sarapshylarynyń baǵalaýynsha, saqtandyrylǵan shyǵyn kólemi 1,2 mlrd eýroǵa jetýi múmkin. Financial Times saýalnama júrgizgen brokerler de shyǵyn 1 mlrd eýrodan asatynyn boljaıdy. Bul kórsetkish 2023 jyldyń jazynda bolǵan tártipsizdikterden kelgen 700-800 mln eýro shyǵynnan asyp tústi.
— Jappaı tártipsizdiktiń beleń alýy tabıǵı apattarǵa uqsap barady, — dedi Morningstar sarapshysy Markos Alvares.
Onyń aıtýynsha, júzdegen mıllıon eýro shyǵyn ákeletin mundaı oqıǵalar endi jyl saıyn qaıtalanýy múmkin. Zorlyq-zombylyqtyń qysqa merzimde keń taralýy men ınflıatsııa shyǵyny kóleminiń 2023 jylmen salystyrǵanda jyldam ósýine áser etken.
Frantsııanyń saýda mınıstri Serj Papenniń aldyn ala baǵalaýynsha, el boıynsha keminde 3 myń kásiporynǵa shyǵyn kelgen. Bastapqyda beıbit ótken narazylyqtar Parıj, Marsel, Lımoj jáne basqa qalalarda jappaı tártipsizdikke, tonaý men ǵımarat órteýge ulasqan. Senbi kúni shamamen 2 400 adam ustaldy.
Frantsııa bıligi tártipsizdikterden kelgen shyǵyndy óteý úshin memleket kepildigimen 4 mlrd eýroǵa deıingi mindetti saqtandyrý júıesin ázirlep jatyr. Alaıda Eýrokomıssııanyń maquldaýy qajet bolǵandyqtan, júıe áli kúshine engen joq. Sondyqtan qazirgi shyǵyndy jeke saqtandyrý jáne qaıta saqtandyrý kompanııalary óteıdi.
Sonymen qatar Frantsııada jappaı tártipsizdikterden keıin keı qalalarda komendanttyq saǵat engiziletinin habarlaǵan edik.
