Frantsııadaǵy jappaı narazylyq: bılik 70 myń tártip saqshysyn jumyldyrdy
ASTANA. KAZINFORM — Frantsııa bıligi 24 qazan kúni qymbatshylyqqa qarsy jáne joǵary synyp oqýshylaryn qoldaýǵa baǵyttalǵan jappaı narazylyqtardy baqylaý úshin qaýipsizdik kúshterin jumyldyrdy, dep habarlaıdy Kazinform agenttiginiń menshikti tilshisi.
Frantsııanyń ishki ister mınıstri Loran Nýnes elde 70 myń polıtsııa qyzmetkeri men jandarm iske kirisetinin málimdedi. Bul 17 qazandaǵy kórsetkishten 10 myńǵa kóp. Іshki ister mınıstrligi sol kezde kóshege shamamen 550 myń adam shyqqan dese, kásipodaqtar men aktsııa uıymdastyrýshylary narazylyqqa 800 myń adam qatysty dep esepteıdi. Sondaı-aq aktsııa kezinde jappaı tártipsizdik, tonaý jáne ǵımarattardy órteý oqıǵalary tirkeldi.
— Qoǵamdyq múlikke zııan keltirgenderge qatań shara qoldanyp, eshbir zańbuzýshylyqty nazardan tys qaldyrmaımyz, — dedi ІІM basshysy.
Onyń aıtýynsha, tártip saqtaýǵa aýmaqtyq bólimsheler men mobıldi kúshterden bólek, RAID, GIGN jáne BRI arnaıy jasaqtary da tartyldy. Olar narazylyq bildirýshilermen tikeleı baılanysqa túspeı, strategııalyq nysandardy kúzetedi.
Jandarmerııanyń 20-ǵa jýyq Centaure brondy kóligi, polıtsııanyń 15 sý shashatyn mashınasy, tikushaqtar, drondar men olarǵa qarsy quraldar da tartyldy. «Sentınel» operatsııasyna qatysqan áskerı qyzmetshilerdiń bir bóligi nysandardy kúzetip, polıtsııanyń sherý kezindegi jumysyn jeńildetedi.
Mınıstr Nýnes áleýmettik jelilerde ásire solshyldar men radıkaldy solshyl toptardyń tártipsizdik jasap, dúnıe-múlikti talqandaýǵa shaqyrǵanyn atap ótti. Buǵan jaýap retinde bılik baqylaýdy kúsheıtip, Lıon, Marsel, Nıtstsa jáne Parıj ortalyǵyndaǵy birqatar aýdanda narazylyq aktsııalaryna tyıym saldy, sondaı-aq sherý baǵyttaryn shektedi. Qaýipti aýdandarda túngi komendanttyq saǵat engizildi. Negizinen, tek kelisilgen kásipodaq sherýlerine ruqsat berildi.
Parıjde qaýipsizdik maqsatynda Lývr, Orse, Pıkasso mýzeıleri men Gran-Pale jabyldy. Al Art Basel Paris jármeńkesin uıymdastyrýshylar sharany eki kún buryn aıaqtady.
Boljam boıynsha, senbi kúni narazylyq aktsııalaryna 400-500 myń adam qatysýy múmkin. «Sary keýdesheliler» aınalma joldardy, janarmaı quıý beketterin, vokzaldar men jaıaý júrginshiler kópirlerin jabýdy kózdeıtin 700-den astam aktsııa ótkizýdi josparlap otyr. Taǵy bir shıelenis oshaǵy Orlean qalasynda bolýy múmkin. Munda «Ulttyq birlestik» partııasynyń eki kúndik sezi ótedi. Boljam boıynsha, sezge qarsy narazylyq bildirý úshin qalaǵa 20-30 myń adam keledi.
Orlean qalasynda ásire ońshyl saıasatker Marın Le Pen prezıdenttik naýqanyn bastaıtynyn resmı túrde jarııalaıdy dep josparlanyp otyr.
Kazinform agenttigine bergen túsiniktemesinde Frantsııadan saılanǵan Eýroparlament depýtaty Vırjını Joron eldegi tártipsizdikter men jappaı tóńkeristi sońǵy 40 jyldaǵy ústirt sheshimderdiń saldary dep atady.
Onyń aıtýynsha, qala mańyndaǵy máseleler, bilim berý daǵdarysy men baqylaýsyz kóshi-qon jastardyń bir bóligin Frantsııa qoǵamynyń dástúrli qundylyqtarynan alystatqan.
Eýroparlament depýtaty áleýmettik-ekonomıkalyq talaptarmen sherýge shyqqan stýdentter men radıkaldy kózqarastaǵy quqyq buzýshylardy ajyratý mańyzdy ekenin atap ótti.
«Ulttyq birlestik» partııasy quqyq qorǵaý organdaryna qoldaý kórsetýdi, túrmeler sanyn arttyrýdy, jazanyń bultartpastyǵyn qamtamasyz etýdi jáne radıkaldy toptardy ekstremıstik ári terrorıstik uıymdar tizimine engizýdi usynady. Depýtattyń aıtýynsha, «Ulttyq birlestikti» qoldaıtyndar qatary artyp keledi. Frantsýzdar qaýipsizdik pen tártipti qalaıdy jáne 2027 jylǵy saılaýdan ózgeris kútedi.
Buǵan deıin Frantsııa prezıdenti Emmanıýel Makron joǵary synyp oqýshylary uıymdarynyń ókilderimen kezdesti. Olar kezdesýdi jalpy oń baǵalaǵanymen, naqty sharalar qabyldanǵansha narazylyqty jalǵastyrýǵa shaqyrdy. Negizgi talaptary – Parcoursup platformasyn reformalaý jáne bilim salasyna qosymsha qarjy bólý. Premer-mınıstr Sebasten Lekornıý olarmen dúısenbi kúni kezdesedi.
17 qazandaǵy oqıǵalardan keıin myńdaǵan adam ustaldy. Senbi kúni ǵana 2 400-den astam adam qolǵa túsip, keıingi tekserýler barysynda taǵy júzdegen adam quryqtalǵan. Saqtandyrý salasynyń sarapshylarynyń málimetinshe, keltirilgen shyǵyn júzdegen mıllıon eýrony quraıdy. Al saqtandyrý ótemaqysynyń kólemi 1-1,2 mlrd eýroǵa deıin jetýi múmkin. Bılik sot protsesteri jedel júrgiziletinin málimdedi. Sondaı-aq kúsh qoldaný kezinde proportsıonaldyq qaǵıdaty saqtalatynyn atap ótti.
Buǵan deıin Parıjde tártipsizdikke baılanysty Lývr, Orse, Pıkasso murajaıy jáne Gran-Pale jabylatyny habarlanǵan bolatyn.
