Frantsııadaǵy úsh lıýks qonaqúı alǵash ret Palace mártebesinen aıyryldy
ASTANA. KAZINFORM – Frantsııadaǵy birden úsh tanymal lıýks sanatyndaǵy qonaqúı – Park Hyatt Paris-Vendome, Mandarin Oriental Paris jáne Hotel du Palais eldiń qonaqúı ındýstrııasyndaǵy eń joǵary sanat sanalatyn Palace mártebesinen aıyryldy, dep habarlaıdy Euronews.
Mundaı sheshimdi Frantsııadaǵy eń úzdik bes juldyzdy qonaqúılerdi baǵalaıtyn arnaıy komıssııa qabyldady. Málimetke sáıkes, keıbir qonaqúıler mártebeni saqtap qalý úshin qajet joǵary talaptarǵa endi saı kelmeıdi. Esepte birqatar mindetti talaptar boıynsha «kemshilikter» anyqtalǵany aıtylǵan.
Park Hyatt Paris-Vendome mártebesinen ınfraqurylym men qyzmet kórsetý sapasyn jetkilikti deńgeıde jańartpaǵany úshin aıyryldy. Osyndaı jaǵdaı Hotel du Palais qonaqúıinde de baıqalǵan. Al Mandarin Oriental Paris aýqymdy qaıta jańǵyrtý jumystaryna daıyndalyp jatqandyqtan, mártebeni qaıta qaraý bolashaqtaǵy ózgeristermen baılanysty bolýy múmkin.
Sondaı-aq ańyzǵa aınalǵan Hotel Byblos qonaqúıine qatysty aqparat ta nazar aýdartty. Qonaqúı Palace mártebesine ıe nysandardyń resmı tiziminen joǵalyp ketkenimen, Frantsııa bıligi bul aqparatty ázirge resmı túrde rastaǵan joq.
Tizim qaıta qaralǵannan keıin Frantsııada Palace mártebesine ıe qonaqúıler sany 2019 jylǵy 31 nysannan 27-ge deıin qysqardy. Palace sanatyndaǵy qonaqúılerdiń úshten birinen astamy Parıjde ornalasqan. Bedeldi mártebeden aıyrylǵanyna qaramastan, atalǵan qonaqúılerdiń barlyǵy bes juldyzdy sanatyn saqtap qalyp, Frantsııadaǵy eń qymbat ári sán-saltanatty qonaqúıler qatarynda qala beredi.
2026 jylǵy jańartylǵan Palace Collection tizimin 2 maýsymda Frantsııanyń týrızm mınıstri Serj Papen tanystyrýy tıis.
Eske sala keteıik, Palace mártebesin Frantsııanyń Týrızm mınıstrligi 2010 jyly eldegi eń úzdik bes juldyzdy qonaqúılerdi ereksheleý maqsatynda engizgen.
Bul mártebeni alý úshin qonaqúıler Atout France agenttiginiń tekserýinen ótedi. Mindetti talaptardyń qatarynda spa-aımaqtardyń, fıtnes-ortalyqtardyń, konserj qyzmetiniń jáne birneshe tilde qyzmet kórsete alatyn personaldyń bolýy qarastyrylǵan.
Buǵan deıin elimizde qonaqúılerge «juldyz» berý júıesi jańartylatynyn jazdyq.
