Frantsııadaǵy saılaýdyń aldyn ala qorytyndysy belgili boldy

ASTANA. KAZINFORM – Frantsııada Ulttyq assambleıaǵa kezekten tys saılaýda daýys berýdiń birinshi kezeńi ótti.

Eýroparlament saılaýynan keıin Frantsııa prezıdenti Emmanıýel Makron Ulttyq assambleıany taratyp, merziminen buryn saılaý taǵaıyndaý týraly sheshim qabyldady.

Jeksenbide 49,3 mln-nan astam frantsýz parlamenttik saılaýdyń birinshi kezeńine qaıta daýys berýge shaqyryldy.

Aldyn ala boljam boıynsha, Marın Le Penniń «Ulttyq birlestigi» 34,2% daýyspen (240–270 depýtat) «Jańa halyqtyq maıdannan» ozyp, birinshi orynda tur. «Solshyl partııalar alıansy» 29,1% (180–200 depýtat) daýys jınady.

Prezıdenttik «Jandaný» partııasy men onyń odaqtastary «Modem» men «Kókjıekter» 21,5% daýys jınap (60–90 depýtat), úshinshi orynda tur. Odan keıin tizimde 10% daýysqa ıe bolǵan respýblıkashyldar (30-50 depýtat) tur.

Bul 1978 jyldan beri daýys berýge kelgen halyq sany eń kóp saılaý boldy. Saǵat 18:00-de oǵan qatysqan frantsýzdar sany 59,39% -ǵa deıin ósti.

«Ulttyq birlestik» jetekshisi Marın Le Pen onyń partııasyna absolıýtti kópshilik daýys qajet ekenin aıtty.

«Segiz kúnnen keıin Djordan Bardella premer-mınıstr bolyp taǵaıyndalýy úshin bizge absolıýtti kópshilik daýys qajet», - dedi Marın Le Pen Ulttyq assambleıaǵa saılaýdyń birinshi týrynyń aldyn ala qorytyndylary jarııalanǵannan keıin birneshe mınýt ótken soń.