Frantsııadaǵy rekordtyq ystyq: mektepterde sabaq ýaqytsha toqtatyldy
ASTANA. KAZINFORM — Frantsııada kúnniń qatty ystyq bolýyna baılanysty keıbir mektepterde sabaq ýaqytsha toqtatyldy, dep habarlaıdy Anadoly.
Frantsııa meteobaqylaý tarıhynda 1900 jyldan beri bolmaǵan eń ystyq jazdy bastan ótkerdi. Eldiń ekologııa mınıstri Monık Barbıý osy derekti málimdedi.
Barbıý Parıj mańyndaǵy Sen-Mande qalasynda ótken baspasóz máslıhatynda eldegi aptap ystyq pen jaz aılarynda bolǵan orman órti týraly aıtty. Kezdesý Météo-France meteorologııalyq qyzmetiniń shtab-páterinde ótti.
Mınıstrdiń aıtýynsha, 2026 jyldyń jazy Frantsııadaǵy meteorologııalyq baqylaý tarıhyndaǵy eń ystyq jaz bolyp saqtalady.
Barbıý aptap ystyqqa baılanysty keıbir mektepterde sabaq toqtatylǵanyn atap ótti.
— Aýa temperatýrasy 35 gradýstan joǵary bolǵanyna qaramastan, aýrýhanalar naýqastardy qabyldaýǵa májbúr boldy, — dep atap ótti ol.
Mınıstr aptap ystyq pen orman órtiniń saldarynan turǵyn úılerdiń qıraǵanyn, joǵary temperatýradan kóptegen adamnyń, sonyń ishinde jastardyń kóz jumǵanyn aıtty.
Barbıý klımattyń ózgerýine beıimdelý úshin Frantsııaǵa qoǵam men ekonomıkanyń barlyq salasyn qamtıtyn aýqymdy ári keshendi sharalar qajet ekenin basa aıtty.
Onyń aıtýynsha, bılik kelesi jazǵa deıin barlyq mektepti tolyq jańǵyrta almaıdy, alaıda oqý oryndaryna perdeshe men jeldetkishter ornatýǵa bolady.
— Tamyz aıynyń sońyna qaraı orman órti sońǵy 20 jyldaǵy ortasha kórsetkishten alty ese kóp aýmaqty sharpydy, — dedi mınıstr.
Buǵan deıin El-Nıno kúsheıse, álemdi aptap ystyq kútip turǵany habarlanǵan bolatyn.
Aqzat Jıenalına
