Frantsııadaǵy iri murajaılardyń biri qazaqstandyq sýretshilerdiń jumystaryn satyp aldy

ASTANA.KAZINFORM – Elena men Vıktor Vorobevterdiń «Sýretshi uıyqtap jatyr» atty týyndysyn Frantsııadaǵy eń iri murajaılardyń biri – Jorj Pompıdý atyndaǵy Ulttyq mádenıet jáne óner ortalyǵy satyp aldy, dep jaýap berdi QR Mádenıet mınıstrliginiń Mádenıet komıteti Kazinform tilshisiniń resmı saýalyna.

Mádenıet komıtetiniń málimetinshe, batystyq murajaılar kontemporarı art stılinde jumys isteıtin qazaqstandyq sýretshilerdiń týyndylaryn jıi satyp alady. Sondaı-aq, 2021 jyly ıspandyq medıamagnat Tacho Bennet satyp alǵan Zoıa Falkovanyń "Evermust" atty jumysy qazir Barselonadaǵy óner murajaıynda tur.

– Reshat Qojahmetovtyń da týyndylary shetelde joǵary suranysqa ıe. Onyń týyndylaryn Egıpettiń Kaır qalasyndaǵy Ulttyq zamanaýı óner ortalyǵynan jáne Japonııadaǵy Shıgarakı qorynyń keramıkalyq mádenı saıabaǵynan kórýge bolady. Almagúl Meńlibaeva men Erbosyn Meldibekovtiń týyndylary kópten beri shetelde sátti satylyp keledi,- dep qosty Mádenıet komıteti.

«Derbes derekter jáne olardy qorǵaý týraly» QR Zańyna sáıkes kartınalardyń quny kommertsııalyq qupııa sanalady.

Alpysbaı Qazǵulovtyń «Baıqońyr» kartınasy Belgııa hanzadasy Lorannyń kollektsııasynda saqtaýly ekeni buǵan deıin habarlanǵan bolatyn.

Qazaqstandyq sýretshilerdiń týyndylaryn frantsýz juldyzdary Patrısııa Kaas pen Jerar Depardeniń jeke kollektsııalarynan da kezdestirýge bolady.

Sheteldik murajaılar men jeke kollektsıonerlerdiń qolynda Baqyt Bapıshev, Asqar Esdáýletov, Kamıl Mýllashev, Sholpan jáne Birjan Tólesh, Evgenıı Frıdlın, Edýard Kazarıan, Andreı Noda, Marat Bekeev, Alpysbaı Qazǵulov, Batýhan Baımen, Baqytnur Býrdesbekov, Rafael Slekenov, Leıla Mahat, Asqar Esenbaev jáne Jámılá Táken sııaqty qazaqstandyq sýretshilerdiń jumystary saqtalǵan bar.