Frantsııadaǵy iri ereýilge 500 myńnan astam adam shyqty
ASTANA. KAZINFORM – Beısenbi kúni Frantsııanyń kóptegen qalasynda jergilikti kásipodaqtar Frantsııa úkimetiniń ekonomıkalyq saıasatyna narazylyq retinde iri ereýil ótkizdi, dep habarlaıdy Kazinform menshikti tilshisi.
Eldiń Іshki ister mınıstrliginiń málimetinshe, Frantsııa boıynsha sherýlerge 500 myńnan astam demonstrant qatysty. Bul arada kásipodaqtardyń ózi demonstranttar sany 1 mln-ǵa jýyqtady dep málimdeıdi.
Parıjdiń ózinde sherýge shamamen 55 myń demonstrant qatysty. Frantsııa ІІM keshki esebinde 309 adamnyń tutqyndalǵany, olardyń 134-i qamaýda otyrǵany kórsetilgen. Keminde 11 polıtsııa qyzmetkeri jaraqat aldy.
17 qyrkúıekte Іshki ister mınıstri Brıýno Retaıo «óte aýyr ereýil bolady» dep boljanǵanyn málimdep, oǵan «5 myńnan 10 myńǵa deıin» tártipsizdikter men radıkaldy elementterdiń qatysýy múmkin ekenine alańdaýshylyq bildirdi.
Osyǵan baılanysty bılik 80 myńnan 100 myńǵa deıin polıtsııa men jandarmdy, sondaı-aq 24 brondalǵan jedel áreket etý kóligin jumyldyrdy.
Narazylyq sharalary «Bárin buǵattaımyz» qoǵamdyq qozǵalysy da iri ereýil uıymdastyrǵan soń bir aptadan keıin boldy. Bul kún, ıaǵnı 10 qyrkúıek sondaı-aq Sebastıan Lekornıýdiń Frantsııanyń premer-mınıstri bolyp taǵaıyndalýymen tuspa-tus keldi.
Beısenbi kúni kásipodaq uıymdary Frantsııa úkimetiniń bıylǵy jazda jarııalaǵan «qatań» bıýdjet sharalaryna narazylyq bildiretinin habarlady.
Uıymdastyrýshylar qatarynda FDT, CGT, FO, CFE-CGC, CFTC, Unsa, FSU jáne Solidaires kásipodaqtary boldy, olardyń músheleri zeınetaqy reformasyna qarsy sońǵy ereýil bolǵan kúnnen bastap 2023 jyldyń 6 maýsymynan beri alǵash ret birikken maıdan retinde kóshelerge shyqty.
Keshe kólik, densaýlyq saqtaý, bilim jáne basqa sala ókilderi de jumysqa shyqpady. Budan basqa, 50-ge jýyq adam Frantsııanyń Ekonomıka mınıstrliginiń ǵımaratyna qysqa ýaqytqa basyp kirdi. Olaı bolǵanymen, aıtarlyqtaı zaqym nemese buzylý týraly habarlanǵan joq. https://x.com/BFMTV/status/1968639794444968109 Narazylyq bildirýshiler sondaı-aq eldegi keıbir tasjoldardy jaýyp tastaýǵa árekettendi.
Le Figaro basylymynyń jazýynsha, Parıjdegi jaǵdaı salystyrmaly túrde tynysh boldy. Sherýdiń negizgi bóligi merekelik jaǵdaıda ótti. https://www.lefigaro.fr/actualite-france/mobilisation-du-18-septembre-500-000-manifestants-sous-haute-surveillance-20250918
Demonstratsııa aldynda SUD temirjol kásipodaǵynyń jalpy jınalysy ótip jatqan Gare du Nord alańynda mıtıng uıymdastyryldy.
Bir apta buryn bul vokzalǵa myńǵa jýyq demonstrant kirýge árekettengen. Endi kire beriste polıtsııa qyzmetkerleri turdy, al kásipodaq músheleri Palestına týyn jelbiretip, jınalǵan jurtqa sabyrmen sóıledi.
Urandarda prezıdent Emmanıýel Makronnyń otstavkaǵa ketýi jáne Gazadaǵy genotsıdtiń toqtatylýy talap etildi.
- Lekornıýmen birge áskerı bıýdjet eki ese artady, - dedi Tenon aýrýhanasynda jumys isteıtin CGT kásipodaq múshesi frantsýz baspasózine.
Biraq bul kúnniń basty oqıǵasy búkil Frantsııadaǵy sherýler boldy.
Sherýler kóptegen shaǵyn, iri jáne orta qalalarda ótti, bul rette bılik pen uıymdastyrýshylar jarııalaǵan sandar ár túrli boldy: Bastııa men Aıachchoda (1200-den 2500 adamǵa deıin), Lıonda (14 000-nan 20 000-ǵa deıin), Grenoblde (9 500-den 15 000-ǵa deıin), 2 800-den 8 000-ǵa deıin), Marselde (15 000-nan 120 000-ǵa deıin). Jalpy, kásipodaqtar «Frantsııa boıynsha 260 sherý ótti» dep habarlady.
Buǵan deıin Frantsııanyń jańa premer-mınıstri úkimet múshelerine beriletin «ómir boıǵy» jeńildikterdi alyp tastamaq ekenin jazǵan bolatynbyz.