Frantsııadaǵy orman órtteri: 119 myń gektar orman kúlge aınaldy
ASTANA. KAZINFORM – Frantsııanyń ońtústik-batysyndaǵy Jıronda departamentinde bolǵan iri orman órti oqshaýlandy. Alaıda elde tabıǵı órtterge qatysty ahýal áli de kúrdeli. Jaz basynan beri Frantsııada 119 myń gektar orman alqaby janyp ketken. Bul týraly Kazinform agenttigi TASS-qa silteme jasap habarlaıdy.
Frantsııanyń Іshki ister mınıstri Loran Nýnestiń aıtýynsha, órttiń taralýy tolyq toqtatylǵan.
– Órt oqshaýlandy, jalyn endi ári qaraı taralyp jatqan joq, – dedi mınıstr BFMTV telearnasy tikeleı efırde kórsetken brıfıngte.
Sonymen birge mınıstr eldiń ońtústigindegi Var departamentinde jaǵdaıdyń áli de kúrdeli ekenin aıtty. Onda orman órti qaıta kúsheıip, tilsiz jaýmen 1,5 myń órt sóndirýshi kúresip jatyr.
Eýropada, ásirese Ispanııa men Frantsııada, bıylǵy orman órtteri rekordtyq aýqymǵa jetti. Buǵan deıin Eýropalyq komıssııa EO-nyń Azamattyq qorǵanys tetigi aıasynda órtti sóndirýge 13 ushaq, 4 tikushaq jáne Eýroodaq elderinen júzdegen órt sóndirýshi jumyldyrylǵanyn habarlaǵan.
Buǵan deıin Dúnıejúzilik densaýlyq saqtaý uıymy orman órtinen shyqqan tútin bólshekteri adamnyń qan aınalymyna deıin jetýi múmkin ekenin eskertken bolatyn. Sondaı-aq Grekııada orman órtin sóndirý kezinde úsh órt sóndirýshiniń qaza tapqany habarlanǵan.
Osyǵan deıin habarlaǵanymyzdaı, Týnıste jaz bastalǵaly 1000 órt oqıǵasy tirkelip, 12 myń gektar jer janyp ketti.
