Frantsııadaǵy orman órtinen 50 myń gektardan astam aýmaq joıylyp ketken
ASTANA. KAZINFORM — Frantsııanyń ońtústik-batysynda jalǵasyp jatqan orman órtterine baılanysty 22 shildeden beri 140 myńnan astam adam qaýipsiz jerge kóshirildi. Bul týraly jergilikti buqaralyq aqparat quraldaryna silteme jasap, Anadoly agenttigi jazdy.
Órt oshaqtaryn sóndirýge el bıligi áskerı-kólik avıatsııasyn da jumyldyrǵan.
Qazirgi ýaqytta eń kúrdeli jaǵdaı Jıronda jáne Land departamentterinde saqtalyp otyr. Bul óńirlerdegi órt áli tolyq baqylaýǵa alynǵan joq.
Jıronda departamentinde tilsiz jaý shamamen 19 myń gektar orman alqabyn sharpydy. Apat aımaǵynan 110 myń adam evakýatsııalandy. Órtti sóndirýge myńnan astam órt sóndirýshi men ondaǵan ushaq tartylǵan. Sondaı-aq bılik Bordo qalasy men Kap-Ferre kýrortyndaǵy myńdaǵan turǵyndy evakýatsııalaý týraly sheshim qabyldady.
Land departamentinde órttiń aýmaǵy 2,6 myń gektarǵa jetti. Bul óńirden 31 myń adam kóshirilip, tilsiz jaýmen kúreske 500-den astam órt sóndirýshi jumyldyrylǵan.
Sonymen qatar Var departamentindegi Ponteves kommýnasynda da órt áli oqshaýlanǵan joq. Bılik aldaǵy ýaqytta qosymsha evakýatsııa júrgizilýi múmkin ekenin joqqa shyǵarmaıdy.
Frantsııanyń Іshki ister mınıstri Loran Nıýnes buǵan deıin jyl basynan beri elde bolǵan orman órtteri 50 myń gektardan astam aýmaqty joıǵanyn málimdegen edi. Bul kórsetkish ótken jyldyń osy kezeńimen salystyrǵanda shamamen úsh ese joǵary.
Eske sala keteıik, buǵan deıin Eýropadaǵy orman órtteriniń sany 2022 jyldan beri 57%-ǵa óskenin jazdyq.
