Frantsııadaǵy orman órtinen 20 myń adam evakýatsııalandy
ASTANA. KAZINFORM – Frantsııa, Italııa jáne Ispanııada orman órtteri áli de órship tur. Osy aptada Frantsııada eki órt sóndirýshi, Italııada taǵy bir órt sóndirýshi qaza tapty. Frantsııanyń ońtústik-batysynda 20 myńnan astam adamdy evakýatsııalaýǵa týra keldi. Bul týraly VVS jazdy.
Frantsııanyń ońtústik-batysyndaǵy Akvıtanııa óńirine kiretin Jıronda departamentiniń bıligi órttiń 2 myń gektar jerdi sharpyǵanyn málimdedi. Bordo mańyndaǵy jaǵalaýda ornalasqan Le-Porj kommýnasy eń kóp zardap shekti. Kýágerlerdiń aıtýynsha, Le-Porj aspany qyzǵylt sary túske boıalǵan.
– Tús aýa aspanǵa jaıylǵan alyp qara tútindi kórdik, – dedi sársenbi kúni Bordodan demalýǵa kelgen Jıýlı Leonar AFP agenttigine.
Le-Porj meri Marsıal Zanınettı órt orman joldaryn tazalap júrgen tehnıkanyń kesirinen shyǵýy múmkin ekenin aıtty. Alaıda bul málimet ázirge resmı túrde rastalǵan joq.
Óńirde qaýiptiń qyzyl deńgeıi saqtalyp otyr. Ormandy ashyq aýmaqtardaǵy keıbir demalys oryndary jabyldy. Sońǵy eki kúnde órtke baılanysty Bordo mańynan 20 myńnan astam adam evakýatsııalandy. AFP málimetinshe, olardyń basym bóligi – týrıster.
– Biz óte qalyń ósken qaraǵaıly ormanmen kúresip jatyrmyz, – dep túsindirdi órttiń qarqyndylyǵyn órt sóndirý qyzmetiniń kapıtany Vılfrıd Shnaıder AFP agenttigine.
Frantsııanyń ormandy óńirlerinde elektr qozǵaltqyshy jáne ishten janý qozǵaltqyshy bar kólikterdi paıdalanýǵa tyıym salyndy. Birqatar jol jabyldy.
Seısenbi kúni Bordo-Merınıak áýejaıy mańyndaǵy ǵımarattardyń birinde shyqqan órtti sóndirý kezinde eki órt sóndirýshi qaza tapty.
Eske sala ketsek, keshe ǵana Frantsııadaǵy órtke baılanysty 5 myńǵa jýyq adam evakýatsııalanǵanyn jazdyq.
