Frantsııadaǵy oqýshylardyń jappaı narazylyǵyna baılanysty Makron shuǵyl keńes ótkizdi
ASTANA. KAZINFORM — Frantsııa prezıdenti Emmanıýel Makron 6 qazan keshke Elıseı saraıynda lıtseı oqýshylarynyń narazylyǵyna baılanysty jedel keńes ótkizdi, dep habarlaıdy Kazinform agenttiginiń menshikti tilshisi BFMTV telearnasyna silteme jasap.
Kezdesýge premer-mınıstr Sebasten Lekornıý, Іshki ister mınıstri Loran Nýnes jáne Ulttyq bilim mınıstri Edýar Jeffre qatysty.
Elıseı saraıynyń habarlaýynsha, mundaı keńester narazylyq qozǵalysy bastalǵan qyrkúıek aıynyń ortasynan beri turaqty túrde ótkizilip keledi.
Keńes narazylyq qozǵalysynyń «úshinshi kezeńimen» tuspa-tus keldi. Seısenbi kúni lıtseı oqýshylary, muǵalimder men kásipodaq ókilderi ondaǵan qalada kóshege shyqty.
Іshki ister mınıstrliginiń málimetinshe, el boıynsha narazylyq sharalaryna 256 myń adam qatysqan. Onyń shamamen 56 myńy Parıjde bolǵan.
Al narazylyqty uıymdastyrýshylardyń, sonyń ishinde Lıtseı oqýshylary odaǵy USL men Union étudiante uıymynyń málimetinshe, sherýge 450 myń adam qatysqan. Onyń shamamen 100 myńy el astanasynda bolǵan.
Bilim mınıstrliginiń málimetinshe, shamamen 3700 lıtseıdiń 891-inde sabaqtar tolyq nemese ishinara toqtatylǵan. Lıtseı oqýshylarynyń kásipodaǵy bul jaǵdaı shamamen 1800 oqý ornyna áser etkenin málimdedi. Parıj, Lıon, Strasbýrg, Renn jáne Marsel qalalarynda oqý oryndarynyń kireberisteri bógelip, barrıkadalar qoıylǵan jáne polıtsııamen qaqtyǵystar bolǵan. Quqyq qorǵaý organdary kózden jas aǵyzatyn gaz qoldandy.
Narazylyq qozǵalysy 17–21 qyrkúıekte Parıj mańyndaǵy Kreteı qalasyndaǵy Sent-Ekzıýperı lıtseıinde bastalyp, kóp uzamaı Il-de-Frans óńirinen tys jerlerge de tarady. 15–18 jastaǵy oqýshylar muǵalim jetispeýshiligin sheshýdi, synyptardaǵy oqýshy sanyn azaıtýdy, ǵımarattardy jóndeýdi, oqý kúnin qysqartýdy jáne joǵary oqý oryndaryna qabyldaý júıesi — Parcoursup-ty qaıta qaraýdy talap etip otyr.
Bıliktiń málimetinshe, narazylyq bastalǵaly beri myńdaǵan adam ustalǵan, olardyń basym bóligi — kámeletke tolmaǵandar. Júzdegen polıtsııa qyzmetkeri men oqýshy jaraqat alǵan. Dúısenbi kúni Frantsııanyń soltústiginde 15 jastaǵy jasóspirim polıtsııa qoldanǵan arnaıy granatany kótergen kezde qolynan aıyryldy.
Ulttyq assambleıada Lekornıý «saıası tapsyryspen qýǵyn-súrgin júrgizilip jatyr» degen aıypty joqqa shyǵaryp, mundaı áńgimelerdi «ótirik» dep atady. Premer-mınıstr aptanyń sońynda lıtseılerde sabaqtardy toqtatyp, «ishki demokratııa ýaqytyn» ótkizýdi josparlap otyrǵanyn málimdedi. Buǵan deıin Bilim mınıstrligi lıtseı oqýshylary shaǵymdaryn jasyryn túrde joldaı alatyn onlaın platforma iske qosqan bolatyn. Kásipodaq jetekshileri bul sharalardy jetkiliksiz dep baǵalady.
Narazylyqtar qatań bıýdjet jobasyn ázirleý jáne 2027 jylǵy prezıdent saılaýyna birneshe aı qalǵanda ótip jatyr. Makronnyń ekinshi prezıdenttik merzimi aıaqtalyp keledi, sondyqtan ol saılaýǵa qaıta túse almaıdy.
Buǵan deıin Kazinform Frantsııadaǵy lıtseı oqýshylarynyń narazylyǵy júzdegen mekteptiń jumysyna kedergi keltirip, kórshi Belgııaǵa da taraǵanyn habarlaǵan. Sondaı-aq narazylyq kezinde keminde 190 oqýshy jaraqat alǵany týraly jazǵan bolatyn.
