Frantsııadaǵy oqýshylardyń narazylyǵy júzdegen mekteptiń jumysyna kedergi keltirdi
ASTANA. KAZINFORM — Frantsııada joǵary synyp oqýshylarynyń synyptardyń shamadan tys tolýyna, oqý júktemesiniń joǵary bolýyna jáne muǵalimderdiń jetispeýshiligine qarsy narazylyq aktsııalary jalǵasyp jatyr. Narazylyq barysynda 164 adam ustaldy, dep habarlaıdy BBC.
Frantsııa Іshki ister mınıstri Loran Nýnestiń málimetinshe, narazylyq aktsııalary shamamen 180 mektepti qamtydy. 12 qaýipsizdik qyzmetkeri, 12 oqýshy jáne úsh bilim berý uıymynyń qyzmetkeri zardap shekti.
Narazylyqtar ótken aptada Il-de-Frans óńirinde bastalyp, keıin eldiń basqa aımaqtaryna, sonyń ishinde Lıll, Marsel jáne Sedan qalalaryna taraldy.
Birqatar qalada narazylyq aktsııalary bilim berý mekemelerin buǵattaýmen, qoqys órteýmen jáne polıtsııamen qaqtyǵystarmen qatar júrdi.
Frantsııa Premer-mınıstri Sebasten Lekornıý lıtseıler mańyndaǵy zorlyq-zombylyq oqýshylarǵa, qyzmetkerlerge jáne polıtsııa qyzmetkerlerine qaýip tóndiretinin aıtty.
Frantsııalyq joǵary synyp oqýshylarynyń «Lıtseı oqýshylarynyń kásipodaqtyq odaǵy» (Union Syndicale Lyceenne) memlekettik qyzmetkerlerdiń ereýilderi aıasynda mektepterdi jalpyulttyq deńgeıde buǵattaýǵa shaqyrdy.
Buǵan deıin Frantsııanyń memlekettik qaryzy elge qaýip tóndirýi múmkin ekendigi týraly jazǵan edik.
