Frantsııadaǵy narazylyqtar: Marselde Rolex pen Louis Vuitton býtıkteri tonaldy
ASTANA. KAZINFORM — Frantsııa prezıdenti Emmanıýel Makron 17 qazandaǵy narazylyq aktsııalary kezinde bolǵan jappaı tártipsizdikterden bir apta ótken soń Marsel qalasyna barady. Bul týraly Elıseı saraıynyń baspasóz qyzmetine silteme jasaǵan frantsýzdyq buqaralyq aqparat quraldary habarlady. Aqparatty Report agenttigi taratty.
Sapar barysynda Makron Marsel qalasynyń meri Benýa Paıanmen kezdesedi.
Elıseı saraıynyń habarlaýynsha, memleket basshysy 17 qazandaǵy tártipsizdikter kezinde zardap shekken qala ákimdigine barady. Sondaı-aq tonaý men buzaqylyq áreketterinen zardap shekken dúken ıelerimen kezdesip, qoǵamdyq tártipti qalpyna keltirýge úles qosqan ishki qaýipsizdik kúshterine alǵys bildiredi.
Buǵan deıin Marsel meri Benýa Paıan narazylyq aktsııalary kezinde qoǵamdyq tártipti qamtamasyz etýge jumyldyrylǵan polıtsııa qyzmetkerleriniń sany jetkiliksiz bolǵanyn aıtyp, narazylyǵyn bildirgen edi.
Onyń pikirinshe, 30 myń adam qatysqan narazylyq aktsııalary kezinde, sonyń ishinde 8 myń adamnyń tártipsizdikterge qatysqany eskerilse, 434 ulttyq polıtsııa qyzmetkeri, arnaıy mobıldi polıtsııa bólimshesiniń (CRS) 240 qyzmetkeri jáne 150-den sál astam jandarm qaýipsizdikti tolyq qamtamasyz ete almaǵan.
Baǵanyń ósýine, ómir súrý qunynyń qymbattaýyna jáne halyqtyń satyp alý qabiletiniń tómendeýine qarsy shyqqan narazylyq bildirýshiler qala ákimdiginiń ǵımaratyn qıratqan.
Budan bólek, belgisiz adamdar men tártipsizdikke qatysýshylar Rolex jáne Louis Vuitton býtıkterin qosa alǵanda, qymbat taýarlar satatyn dúkenderdi tonaǵan. «Marsel» fýtbol klýbynyń resmı dúkeni de aıtarlyqtaı zaqymdanyp, ýaqytsha jabylýǵa májbúr bolǵan.
Marsel saýda-ónerkásip palatasynyń málimetinshe, qala ortalyǵynda shamamen 500 dúken tonalǵan.
Frantsııadaǵy jappaı tártipsizdikter qoǵamdaǵy áleýmettik qaıshylyqtardy ýshyqtyryp, prezıdent saılaýy qarsańyndaǵy saıası tartysty kúsheıtti. Turmys qunynyń qymbattaýyna jáne memlekettik shyǵyndardyń qysqarýyna qarsy narazylyqtardyń astarynda áldeqaıda kúrdeli máseleler jatyr. Olardyń qatarynda radıkaldy qozǵalystardyń kúsheıýi men ımmıgranttar qaýymdastyǵynyń frantsýz qoǵamyna beıimdelýindegi qıyndyqtar bar. Bul máselelerdiń ózara baılanysy jáne olardyń Frantsııanyń saıası bolashaǵyna yqpaly týraly Kazinform agenttiginiń halyqaralyq sholýshysynyń materıalynan oqyńyz.
