Frantsııadaǵy narazylyq kezinde 190 oqýshy zardap shekti
ASTANA. KAZINFORM — Frantsııanyń túkpir-túkpirinde qyrkúıek aıynyń sońynda bastalǵan joǵary synyp oqýshylarynyń narazylyq aktsııalary kezinde keminde 190 oqýshy zardap shekti. Keı jerlerde narazylyq jappaı tártipsizdikke ulasqan, dep habarlaıdy Kazinform agenttigi TASS-qa silteme jasap.
Bul týraly Frantsııanyń Ulttyq bilim mınıstri Edýar Jeffre BFMTV telearnasynyń efırinde málimdedi.
— Qolda bar sońǵy málimet boıynsha, narazylyq aktsııalary bastalǵaly beri oqýshylar arasynda 190 adam zardap shekken, — dedi ol.
Mınıstrdiń aıtýynsha, olardyń kópshiligi túrli nysandarǵa kóterilgen kezde bıikten qulap nemese narazylyq bildirýshiler pırotehnıkalyq quraldardy qoldanǵandyqtan kezdeısoq jaraqat alǵan. Sonymen qatar ol 5 qazanda Lanse qalasynda bolǵan oqıǵany atap ótti. Onda jasóspirim zaqymdaıtyn elementteri bar polıtsııa granatasyn jerden kóterip alǵan kezde qolynan aýyr jaraqat alǵan.
Jeffre bul jaǵdaıǵa qatysty pikir bildire otyryp, basqa mınıstrliktiń jumysyna aralaspaıtynyn, onyń ústine oqıǵanyń barlyq mán-jaıynan habardar emes ekenin aıtty. Alaıda ol «Frantsııanyń búkil aýmaǵynda oqýshylar men eresekterdiń qaýipsizdigi qamtamasyz etilýi kerek» degen ustanymda ekenin atap ótti.
Eske salaıyq, joǵary synyp oqýshylarynyń narazylyq aktsııalary qyrkúıek aıynyń sońynda astanalyq Il-de-Frans aımaǵynda bastalyp, keıin búkil Frantsııaǵa tarady. Narazylyq bildirýshiler oqý kestesiniń shamadan tys júktelýine, muǵalimderdiń jetispeýshiligine jáne bilim berý júıesindegi basqa da máselelerge qarsylyq bildirip jatyr. Keı jerlerde aktsııalar jappaı tártipsizdikke jáne polıtsııamen qaqtyǵysqa ulasty.
Osy ýaqyt ishinde quqyq qorǵaý organdary 5 myńnan astam adamdy ustady. Olardyń 90 paıyzy kámeletke tolmaǵandar bolǵan.
Sonymen qatar frantsýz oqýshylarynyń jappaı narazylyǵy kórshiles Belgııaǵa da tarady. Buǵan qosa, narazylyq aktsııalaryna baılanysty Frantsııada 400-den astam mekteptiń jabylǵany habarlandy.
Bul týraly jeksenbi kúni Ulttyq bilim mınıstri Edýar Jeffre France 2 telearnasy men France Inter radıosynyń efırinde málimdedi.
Ulttyq bilim mınıstriniń aıtýynsha, bilim berý júıesiniń 78 qyzmetkeri de narazylyq kezinde jaraqat alǵan kórinedi.
