Frantsııadaǵy kolledjde órt shyqty: qasaqana órteý nusqasy qarastyrylyp jatyr
ASTANA. KAZINFORM — Senbige qaraǵan túni Frantsııanyń soltústik-shyǵysyndaǵy Mets qalasynyń Sablon aýdanynda ornalasqan Fransýa Rable kolledjinde órt shyqty. Órt juma kúni saǵat 22:30 shamasynda bastalyp, tún ortasyna deıin sóndirildi, dep habarlaıdy Kazinform tilshisi.
Polıtsııa men jergilikti basylymdardyń málimetinshe, aldymen kolledj qyzmetkerleriniń eki-úsh kóligi, onyń ishinde komendant pen basshylyqtyń kólikteri órtengen. Sonymen qatar oqý ornynyń qaqpasy men qabyrǵalary zaqymdalǵan.
Oqıǵa ornyna onǵa jýyq órt sóndirý toby jiberildi. Saǵat 23:30-ǵa qaraı órt tolyq sóndirildi.
Mets prokýratýrasy adam ómirine qaýip tóndiretin tásilmen bótenniń múlkin joıý faktisi boıynsha tergeý bastady. BFMTV málimetinshe, prokýror qasaqana órteý nusqasyn basym baǵyt retinde qarastyryp otyr.
Prokýror órttiń sońǵy bir aptadaǵy frantsýz lıtseı oqýshylarynyń narazylyq aktsııalarymen baılanysyn rastaǵan joq, biraq joqqa da shyǵarmady.
Al Mets qalasynyń meri Fransýa Grosdıde bul eki oqıǵanyń arasynda baılanys bar ekenin alǵa tartty. Onyń aıtýynsha, «belgili bir adamdar bul oqý ornyn órteý úshin kelgen». Ol buǵan deıin Montını-le-Mets qalasyndaǵy Leonardo da Vınchı lıtseıiniń mańynda órt bolǵanyn eske salyp, sot pen bıliktiń qatań shara qoldanýy qajet ekenin aıtty.
Kolledjdiń ıesi sanalatyn Mozel departamentiniń keńesi oqý ornyn dúısenbi kúni ashýdy josparlap otyr. Alaıda zaqymdanǵan ǵımarattar ázirge paıdalanylmaıdy. Departament prezıdenti Patrık Vaıtenniń aıtýynsha, tıisti qyzmetter aýmaqty qaýipsizdendirip qoıǵan, sondyqtan sabaqtar zardap shekken bólmelerden basqa jerlerde qaıta jalǵasady.
Al qala meri oqý ornynyń tolyqqandy jumysy uzaq ýaqytqa toqtaýy múmkin dep qaýiptenedi. Óıtkeni kolledjdegi jalǵyz sanıtarlyq torap órtenip ketken. Qalypty jumys isteý úshin elektr jelisi men dárethanalardy qalpyna keltirý qajet.
Frantsııada lıtseı oqýshylarynyń narazylyq aktsııalary 17-21 qyrkúıek aralyǵynda Kreteı akademııasynda bastalyp, keıin basqa óńirlerge de tarady. Narazylyq bildirýshilerdiń basym bóligi 15-18 jastaǵy oqýshylar. Olar muǵalimder jetispeýshiligin joıýdy, synyptardaǵy oqýshy sanyn azaıtýdy, ǵımarattardy jóndeýdi jáne oqý júktemesin jeńildetýdi talap etip otyr. Bul talaptardyń qatarynda joǵary oqý ornyna túsýge arnalǵan Parcoursup júıesine qatysty máseleler de bar.
Lıtseı oqýshylarynyń USL odaǵy men stýdentterdiń Union étudiante kásipodaǵy 1 qazanda narazylyq qozǵalysynyń «ekinshi kezeńin» jarııalap, aktsııalardy 6 qazanda jalǵastyrýǵa shaqyrdy.
Іshki ister mınıstrliginiń málimetinshe, 1 qazanǵa deıin narazylyq qozǵalysyna 356 oqý orny qatysty. Bir táýlikte 625 adam ustalyp, quqyq qorǵaý organdarynyń 83 qyzmetkeri jaraqat alǵan. Narazylyq aktsııalaryna stýdentter de qosyldy. Union étudiante uıymynyń málimetinshe, shamamen 30 kampýsta narazylyq ótken. Nant pen Rýan qalalarynda mektepterdiń kireberisinde órt shyqqany habarlandy.
Premer-mınıstr Sebastıan Lekornıý vedomstvoaralyq daǵdarys shtabyn shaqyryp, narazylyqtyń órshýin jaýapsyzdyq dep atady. Al Ulttyq bilim mınıstri Edýar Jeffre bul qozǵalysty agressıvti toptar óz múddesine paıdalanyp otyr dep málimdedi.
Buǵan deıin Kazinform frantsýz mektep oqýshylarynyń narazylyq tolqyny kórshi Belgııaǵa da taraǵanyn habarlaǵan. 1 qazanda Lej qalasy men onyń mańyndaǵy birqatar mektep buǵattalyp, keı jerlerde qoqys konteınerleri órtenip, ǵımarattardyń qasbetteri zaqymdalǵan.
Frantsııadaǵy oqýshylar narazylyǵy aıasynda 5000-nan astam adam ustalǵany habarlandy.
