Frantsııadaǵy Fontenblo ormanynyń 10%-y órtten joıyldy
ASTANA. KAZINFORM – Frantsııa prezıdenti Emmanıýel Makron Parıjdiń «jasyl ókpesi» sanalatyn Fontenblo ormanynyń 10 paıyzy órt saldarynan kúlge aınalǵanyn málimdedi, dep habarlaıdy Anadoly.
Makron Parıjden 60 shaqyrym jerde ornalasqan Fontenblo ormanyna baryp, órtti sóndirý jumystaryna qatysyp jatqan órt sóndirýshilermen kezdesti.
Oqıǵa ornynda sóılegen sózinde Frantsııa prezıdenti elde bıyl Ekinshi dúnıejúzilik soǵystan beri mundaı aýqymdy orman órtteri bolmaǵanyn aıtty.
Órt sóndirýshilerge qoldaý bildirgen Makron orman órtterine kináli adamdarǵa eshqandaı keshirim bolmaıtynyn atap ótti.
Onyń aıtýynsha, Frantsııa daǵdarys týyndaýyn kútpeı-aq orman órtterimen kúreske arnalǵan tehnıkany jańartýǵa ınvestıtsııa salǵan. Qazirgi ýaqytta órtti sóndirýge qosymsha 70 tikushaq pen ushaq paıdalanýǵa daıyn.
Prezıdenttiń málimetinshe, Fontenblo ormanyndaǵy órt saldarynan shamamen 2 myń gektar aýmaq janyp ketken. Bul ormannyń jalpy aýmaǵynyń 10 paıyzyna teń. Sondaı-aq ol orman órtteri maýsymy áli alda ekenin aıtyp, jaz mezgili aýyr bolatynyn eskertti.
Le Parisien gazetiniń habarlaýynsha, Fontenblo ormanynyń birneshe jerinde órt qoıdy degen kúdikpen 18 jastaǵy eki jas 15 shilde kúni keshke ustalǵan. Olarǵa qasaqana órt qoıý arqyly múlikke zııan keltirdi degen aıyp taǵylǵan.
Tergeý barysynda kúdiktilerdiń biri, erikti órt sóndirýshi ekeni belgili bolǵan jas jigit, burynǵy jaýabyn ózgertip, sýdıaǵa Arbon-la-Fore eldi mekeninde shyrpy men benzınniń kómegimen butalardy ózi órtegenin moıyndaǵan.
Ekinshi kúdikti Fontenblodaǵy at sporty stadıony aýmaǵyna temeki tuqylyn tastap, órtti abaısyzda shyǵarǵanyn aıtqan.
Fontenblo ormanyndaǵy órt 12 shildede bastalǵan.
Aıta ketelik Frantsııada ormandy qasaqana órtedi degen kúdikpen 32 adam ustalǵan edi.
