Frantsııadaǵy áıgili kýrorttyq túbek alapat orman órtine baılanysty tegis evakýatsııalandy
ASTANA. KAZINFORM — Frantsııanyń ońtústik-batysynda tutanǵan alapat orman órti eldegi eń tanymal demalys aımaqtarynyń biri – Kap-Ferre túbegin tolyq evakýatsııalaýǵa májbúr etti. Tabıǵı apat ondaǵan turǵyn úıdi kúlge aınaldyryp, ázirshe tolyq aýyzdyqtalǵan joq, dep habarlaıdy BelTA.
Frantsııanyń Іshki ister mınıstri Loran Nýnestiń aıtýynsha, 24 shildedegi jaǵdaı boıynsha órttiń aýmaǵy 10 myń gektardan asty. Qazirdiń ózinde shamamen 40 myń adam evakýatsııalandy nemese evakýatsııalanyp jatyr. Olardyń qatarynda kempıngter men jalǵa alynǵan úılerde demalyp jatqan myńdaǵan týrıst bar.
Evakýatsııa kezeń-kezeńimen, «aýyldan aýylǵa» qaǵıdaty boıynsha júrgiziledi. Turǵyndar men demalýshylar teńiz kóligimen nemese túbekti materıkpen baılanystyratyn jalǵyz avtojol arqyly qaýipsiz jerge kóshirilip jatyr.
Arkashon shyǵanaǵynyń soltústigindegi Jıronda óńirinde órtti sóndirýge 800-ge jýyq órt sóndirýshi men tórt amfıbııa ushaǵy jumyldyrylǵan. 22 shildede bastalǵan órt áli kúnge deıin tolyq aýzdyqtalǵan joq. Qaýipsizdik maqsatynda aýdannyń basym bóligindegi joldar, sonyń ishinde Ferre múıisine aparatyn baǵyttar tótenshe qyzmetterden basqa barlyq kólik úshin jabyldy. Aldyn ala málimet boıynsha, órtten shamamen 80 turǵyn úı joıylǵan.
Taǵy bir iri orman órti Bıskarross kýrorty mańynda tirkeldi. Onda tilsiz jaý 2,5 myń gektardan astam aýmaqty sharpyp, shamamen 25 myń adam evakýatsııalandy.
Frantsııa bıliginiń málimetinshe, qazir el aýmaǵynda ártúrli deńgeıdegi 32 orman órti tirkelgen. Jyl basynan beri 50 myń gektarǵa jýyq orman órtengen. Bul byltyrǵy osy kezeńmen salystyrǵanda tórt esege jýyq kóp.
Ǵalymdar alapat orman órtteriniń kóbeıýin klımattyń ózgerýimen baılanystyrady. Olardyń baǵalaýynsha, Eýropadaǵy aýa temperatýrasy álemdik ortasha kórsetkishpen salystyrǵanda shamamen eki ese jyldam ósip keledi. Bul ekstremaldy aýa raıy qubylystarynyń jıileýine áser etip jatyr.
Qazirgi ýaqytta Ońtústik Eýropanyń kóptegen elderinde aptap ystyq pen qurǵaqshylyq saqtalyp otyr.
Eske salaıyq, buǵan deıin Frantsııadaǵy orman órtinen 20 myń adam evakýatsııalanǵanyn habarlaǵanbyz.
