Frantsııadaǵy aptap ystyqqa baılanysty atom reaktorlary ýaqytsha toqtatyldy
ASTANA. KAZINFORM – Frantsııanyń memlekettik energetıkalyq EDF kontserni rekordtyq aptap ystyqqa baılanysty ekologııalyq qaýiptiń aldyn alý maqsatynda eki ıadrolyq reaktordyń jumysyn ýaqytsha toqtatty, dep habarlaıdy Euronews.
Aptap ystyq saldarynan elde keminde 18 adamnyń qaza tapqany rastaldy. Sonymen qatar 18 maýsymnan beri keminde 40 adam sýǵa ketken.
Beısenbi kúni toqtatylǵan reaktorlar Parıjdiń soltústigindegi Sena ózeni jaǵasynda ornalasqan Nojan-sıýr-Sen atom elektr stansasynda jáne eldiń ońtústik-shyǵysyndaǵy Lıon qalasyna jaqyn Rona ózenindegi Bıýje AES-inde ornalasqan. Eki jaǵdaıda da reaktorlardyń toqtatylýyna ózen sýynyń temperatýrasynyń kóterilýi sebep boldy. Zań boıynsha EDF sý ekojúıesine zııan keltirýi múmkin jyly sýdy ózenge aǵyzbaý úshin onyń temperatýrasyn turaqty baqylaýǵa mindetti.
Atom elektr stansalary reaktorlardy salqyndatý úshin ózen sýyn paıdalanady. Keıin sý ózenge qaıta jiberiledi. Ádette onyń temperatýrasy alynǵan kezdegiden birneshe ondyq gradýsqa nemese birneshe gradýsqa joǵary bolady. Qatty ystyq kezinde ózen sýynyń ózi qatty jylynatyndyqtan, operatorlar zańda belgilengen temperatýralyq shekten aspaý úshin elektr energııasyn óndirý kólemin azaıtýǵa nemese reaktorlardy ýaqytsha toqtatýǵa májbúr.
Osy aptada Nojan-sıýr-Sen AES-i óz reaktorlarynyń biriniń qýatyn qysqartns.
– Bul Sena ózeninen alynatyn jáne qaıta aǵyzylatyn sý arasyndaǵy temperatýra aıyrmasyn azaıtyp, sý florasy men faýnasyn qorǵaý úshin jasaldy, – dep habarlady EDF.
Dúısenbi kúni Frantsııanyń ońtústik-batysyndaǵy Garonna ózeninde ornalasqan Golfesh atom elektr stansasynyń bir reaktory da toqtatyldy. Sonymen qatar EDF-tiń 57 reaktordan turatyn atom elektr stansalarynyń birqatarynda qýat tómendetildi. Ótken jyly osy stansalar Frantsııadaǵy elektr energııasynyń shamamen 70 paıyzyn óndirgen.
Soǵan qaramastan Frantsııanyń elektr energetıkalyq júıesiniń operatory RTE sársenbi kúni:
– Frantsııada jekelegen nysandar toqtatylǵan jaǵdaıda da elektr energııasyna degen suranysty tolyq qamtamasyz etýge jetkilikti óndiristik qýat bar, – dep málimdedi.
Frantsııanyń 96 departamentiniń jartysynan astamynda ómirge qaýip tóndiretin eń joǵary – qyzyl deńgeıdegi qaýip jarııalandy. Bılik turǵyndardy tikeleı kún sáýlesinen saqtanýǵa jáne aptap kúsheıgen saıyn «barynsha qyraǵylyq tanytýǵa» shaqyrdy.
Météo-France málimetinshe, 23 maýsym, seısenbi kúni 1947 jyldan beri júrgizilip kele jatqan meteobaqylaýlar tarıhyndaǵy eń ystyq kún retinde tirkeldi.
Ǵalymdar jaǵdaıdyń aldaǵy ýaqytta kúrdelene túsetinin eskertedi. Jańa aýqymdy zertteýge sáıkes, Eýropanyń jekelegen óńirlerinde aptap ystyq 1970 jyldarmen salystyrǵanda jyl saıyn 40 kúnge deıin uzaqqa sozylady.
Eske sala ketsek, aptap ystyq saldarynan Eıfel munarasy ýaqytsha jabyldy.
