Frantsııadaǵy aptap ystyq: bılik 60 departamentte qyzǵylt sary eskertý jarııalady
ASTANA. KAZINOFRM — Frantsııada 60 departamentte aptap ystyqqa baılanysty qyzǵylt sary dabyldy eskertý jarııalandy. Elde aýa temperatýrasy 41 gradýsqa jetetini boljanǵan, dep habarlaıdy Anadoly.
Frantsııanyń ulttyq meteorologııalyq qyzmeti — Météo-France málimetinshe, eldiń keıbir óńirlerinde aýa temperatýrasy 41 gradýsqa deıin kóterilýi múmkin. Sınoptıkterdiń boljaýynsha, aptap ystyq kelesi aptada da saqtalady.
Osyǵan baılanysty el bıligi is-qımyldy úılestirý jumystaryn kúsheıtti. Premer-mınıstr Sebastıan Lekorný men 14 mınıstrdiń qatysýymen vedomstvoaralyq daǵdarys toby shuǵyl jıyn ótkizip, qalyptasqan jaǵdaıdy talqylady.
Parıj qalasynda aptap ystyqtyń saldaryn azaıtý úshin birqatar shara qabyldandy. Atap aıtqanda, qalalyq saıabaqtartáýlik boıy jumys isteıtin boldy. Sondaı-aq 17 maýsymnan bastap turǵyndardyń keshki ýaqytta sýǵa túsýine múmkindik berý úshin Sen-Marten kanalynyń bir bóligi ashyldy.
Budan bólek, mektepterdi 1200 jeldetkishpen jabdyqtaý jáne qoǵamdyq basseınderdiń jumys ýaqytyn keshki saǵat 20:00–ge deıin uzartý josparlanyp otyr.
18 maýsymda jarııalanǵan Oxfam France esebinde Frantsııada ystyq aýa raıynyń saldarynan jyl saıyn 5 myńnan astam adamnyń qaıtys bolatyny aıtylǵan.
Osydan bir kún buryn Frantsııada aptap ystyq bastalǵany týraly habarlaǵan bolatynbyz.
