Frantsııada júzim ónimi sońǵy 30 jyldaǵy eń tómengi deńgeıge túsýi múmkin
ASTANA. KAZINFORM – Aptap ystyq pen qurǵaqshylyq saldarynan Frantsııada bıyl júzim ónimi kúrt azaıyp, sońǵy 30 jyldaǵy eń tómen kórsetkishterdiń biri tirkelýi múmkin, dep habarlaıdy Kazinform agenttiginiń Eýropadaǵy menshikti tilshisi.
Frantsııa Aýyl sharýashylyǵy mınıstrliginiń boljamy boıynsha, 2026 jyly elde shamamen 33,9 mln gektolıtr sharap óndiriledi. Bul 2025 jylmen salystyrǵanda 6%-ǵa, al 2021-2025 jyldardaǵy ortasha kórsetkishten 17%-ǵa az.
Eger boljam rastalsa, bıylǵy ónim sońǵy 30 jyldaǵy eń tómen kórsetkishterdiń biri bolady. Al Halyqaralyq júzim jáne sharap uıymynyń (OIV) deregine sáıkes, bul 1957 jyldan bergi eń tómengi nátıje bolýy yqtımal. Boljanyp otyrǵan sharap kólemi shamamen 4,5 mlrd standartty bótelkege teń.
Frantsııa Aýyl sharýashylyǵy mınıstrliginiń Agreste statıstıkalyq qyzmeti ónimniń azaıýyna júzim alqaptarynyń shamamen 2,5%-ǵa qysqarýy ǵana emes, eń aldymen aýa raıynyń qolaısyzdyǵy áser etkenin atap ótti.
– Jaz óte ystyq ári qurǵaq boldy. El aýmaǵynda topyraqtaǵy ylǵal tapshylyǵy kúsheıip, aptap ystyq júzimniń kúnge kúıýine, japyraqtarynyń túsýine jáne jemisteriniń solýyna ákeldi, – delingen vedomstvo esebinde.
Eń kúrdeli jaǵdaı Shampan óńirinde qalyptasqan. Munda tamyzdyń ortasyndaǵy baǵalaý boıynsha júzim ónimi byltyrǵydan 49%-ǵa, al sońǵy bes jyldaǵy ortasha kórsetkishten 47%-ǵa az bolady dep boljanyp otyr. Júzim shoqtarynyń salmaǵy sońǵy 20 jyldaǵy eń tómengi deńgeıge jetken.
Býrgýndııa men Bojolede ónim kólemi shamamen úshten birge, Lýara ańǵarynda 12%-ǵa tómendeýi múmkin. Al ıÝra óńirinde ónim shamamen 37%-ǵa azaıǵan.
Eldegi eń iri sharap óndiretin aımaq Langedok-Rýssılonda ónim kólemi álsiz bolǵan 2025 jylmen salystyrǵanda 5%-ǵa artady dep kútiledi. Degenmen bul kórsetkish te kópjyldyq ortasha deńgeıden tómen.
Bordoda tamyzdaǵy jaýyn-shashynnan keıin byltyrǵy jylmen salystyrǵanda 10% ósim boljanyp otyr. Alaıda mundaǵy ónim kólemi de sońǵy bes jyldaǵy ortasha kórsetkishke jetpeıdi.
Aptap ystyq júzimniń erte pisýine áser etkendikten, Frantsııanyń kóptegen óńirinde, sondaı-aq Eýropanyń basqa elderinde júzim jınaý naýqany ádettegiden erte bastaldy.
Frantsııa Italııadan keıingi álemdegi ekinshi iri sharap óndirýshi sanalady. Bıylǵy boljam rastalsa, bul eldegi qatarynan úshinshi álsiz ónim bolmaq. Buǵan deıin 2024 jáne 2025 jyldary da júzim ónimi tómen bolǵan.
Frantsııa úkimeti buǵan deıin rekordtyq aptap ystyqtan zardap shekken fermerlerge 1 mlrd eýrodan astam tótenshe kómek paketin jarııalaǵan. Qolaısyz aýa raıy júzim alqaptarymen qatar basqa da aýyl sharýashylyǵy daqyldaryna áser etti.
Aıta keteıik, Frantsııanyń ońtústiginde taǵy 225 gektar orman órtke orandy.
