Frantsııada júzdegen mektep narazylyqqa baılanysty jabyq qalady
ASTANA. KAZINFORM — Seısenbide oqýshylar, stýdentter men muǵalimder jalpyulttyq narazylyqtyń jańa kezeńin ótkizýdi josparlap otyr, dep habarlaıdy Euronews.
Dúısenbide Frantsııada 400-den astam mektep jabyq bolady. Úkimet ókilderi joǵary synyp oqýshylarynyń jappaı narazylyǵyna baılanysty oqý oryndarynda tıisti qaýipsizdik deńgeıin qamtamasyz etý múmkin emes ekenin málimdedi. Buǵan qosa, ótken aptada tártipsizdikter saldarynan jıyrmadan astam mektep órtenip, tonalǵan.
Narazylyqtar bastalǵan ótken dúısenbiden beri úkimettiń málimetinshe, 170 oqýshy men bilim berý júıesiniń 78 qyzmetkeri jaraqat alǵan. 5 myńnan astam adam ustaldy, olardyń basym bóligi — kámeletke tolmaǵandar.
Frantsýz lıtseıleriniń joǵary synyp oqýshylary mektep bilim berý júıesindegi máselelerge, eń aldymen, qarjylandyrýdyń qysqarýyna narazylyq bildirip jatyr. Olardyń aıtýynsha, bul muǵalim tapshylyǵyna, oqý kúniniń uzarýyna, synyptardyń qajetti qural-jabdyqtarmen jetkilikti qamtylmaýyna jáne oqý ǵımarattarynyń sanıtarlyq jaǵdaıynyń nasharlaýyna alyp kelgen.
Narazylyqtar Parıj mańyndaǵy eldi mekenderde bastalyp, solshyl radıkaldy saıası kúshterdiń ashyq qoldaýymen búkil elge tez tarady. Keı jerlerde aktsııalar tártipsizdikke ulasyp, polıtsııa kúsh qoldanýǵa májbúr boldy. Іshki ister mınıstrligi tártipsizdikterge ekstremıstik toptar arandatýshylyq jasaǵanyn aıtyp otyr.
Seısenbige jańa iri narazylyq aktsııalary josparlanǵan. Oǵan muǵalimder kásipodaqtary men stýdentter de qatysady dep kútilýde. Olar endi ózderiniń pikirinshe, quqyq qorǵaý organdarynyń shamadan tys áreketterine de qarsylyq bildirmek.
Budan buryn ótken senbige qaraǵan túni Frantsııanyń soltústik-shyǵysyndaǵy Mets qalasynyń Sablon aýdanynda ornalasqan Fransýa Rable kolledjinde órt shyqqanyn jazǵanbyz.
