Frantsııada jumys isteıtin otandastar: Eldosty qoldaýǵa suranyp keldik

PARIJ. KAZINFORM – Búgin Frantsııada ótip jatqan Olımpıada oıyndarynda Parıj qalasynda jumys istep júrgen bir top qazaq azamattaryn kezdestirip qaldyq. Olar arnaıy Eldos Smetovke qoldaý kórsetý úshin jumystarynan suranyp, jarysqa kelgenderin aıtyp berdi, dep habarlaıdy Kazinform-nyń menshikti tilshisi Kúnsultan Otarbaı. 

«Biz negizi Batys Qazaqstan oblysynyń jigitterimiz. Parıjde jumys istep jatqanymyzǵa 3 aıǵa jýyqtap qaldy. Alaıda, jumys ornymyz qaladan ájeptáýir alysta, shamamen 50-60 shaqyrymdaı jerde zaýytta eńbek etip jatyrmyz. Búgin, Eldos Smetov jarysqa shyǵatynyn estip, arnaıy jumys ornymyzdan suranyp keldik. Beker kelmegen ekenbiz, Eldostiń tarıhı jeńisine birge kýá boldyq», - deıdi qazaq azamattary.

Sondaı-aq, jigitter aldaǵy qazaq sportshylarynyń jarystaryna taǵy da kelip, qoldaý kórsetýge daıyn ekenderin jetkizdi.

«Biz, tek Eldosqa ǵana emes, barlyq qazaqstandyq sportshylarǵa, otandastarymyzǵa qoldaý kórsetýge daıynbyz. Aldaǵy kúnderi taǵy da jarysqa kelemiz. Jerlesterimizge barynsha qoldaý kórsetýge, jankúıer bolýǵa daıynbyz», - dedi olar.

Áńgime barysynda qazaq azamattarynan nege Parıjde jumys istep jatqandaryn, alatyn jalaqy mólsherin de surap qaldyq.

«Biz Qazaqstanda úsh aı jumys jasaǵandaǵy tabatyn aqshamyzdy osynda bir aıda taýyp júrmiz. Qazirgi jumysymyz ózimizge unaıdy. Úsh aı kóleminde elge bir baryp turamyz», - dedi jigitter.

Esterińizge sala keteıik, Olımpıadanyń alǵashqy kúni qazaqstandyq sportshylar el qorjynyna 1 altyn, 1 qola medal saldy.