Frantsııada joǵary synyp oqýshylarynyń jańa narazylyq aktsııasy 8 qazanda ótedi

Oqýshylar men stýdentter kásipodaqtary qabyldanǵan sharalardy jetkiliksiz dep baǵalap, 8 qazan, beısenbi kúni jańa aktsııa ótkizýge shaqyrdy, dep habarlaıdy Kazinform agenttiginiń menshikti tilshisi.

Frantsııanyń Ulttyq bilim mınıstrligi joǵary synyp oqýshylarynyń narazylyǵy «kúrt báseńdegenin» málimdedi. Mınıstrlik eldegi mektepterdiń «onnan toǵyzy qalypty rejımde jumys istep jatqanyn» habarlady.

Mınıstrliktiń naqtylaýynsha, barlyǵy 459 oqý ornynda sabaq tolyq nemese ishinara toqtatylǵan. Onyń 276-synda sabaq tolyq toqtasa, 183-inde ishinara toqtatylǵan. Bir kún buryn, 6 qazanda, mundaı oqý oryndarynyń sany 891 bolǵan.

-Oqıǵalar men irkilister sany da eki eseden astam azaıdy. Sársenbi tańynan beri 232 oqý orny zardap shekti, al seısenbi kúni osy ýaqyttaǵy kórsetkish 496 bolǵan, – delingen mınıstrlik habarlamasynda.

6 qazan, seısenbi kúni el boıynsha joǵary synyp oqýshylary qozǵalysynyń «úshinshi tolqyny» ótti.

Іshki ister mınıstrligi aktsııaǵa qatysýshylar sanyn 266 myń adam dep baǵalady. Onyń shamamen 56 myńy Parıjde boldy.

Aktsııa uıymdastyrýshylarynyń, sonyń ishinde Lıtseı oqýshylarynyń kásipodaqtyq odaǵy (Union syndicale lycéenne) men stýdentter odaǵynyń (Union étudiante) málimetinshe, narazylyqqa 450 myń adam qatysqan. Onyń shamamen 100 myńy el astanasynda bolǵan.

Lıtseı oqýshylaryna muǵalimder, ata-analar jáne kásipodaqtar, sonyń ishinde Frantsııanyń eń iri Frantsýz demokratııalyq eńbek konfederatsııasy (CFDT) qosyldy.

Parıj, Lıon, Strasbýrg, Renn, Nant jáne Týlýza qalalarynda sherýlerdiń kireberisterin buǵattaý, barrıkadalar jáne sherý shetindegi qaqtyǵystar tirkeldi. Quqyq qorǵaý organdary kózden jas aǵyzatyn gaz ben sý atqyshtardy qoldandy.

Bir táýlikte 488 adam ustaldy. 48 polıtsııa qyzmetkeri jaraqat aldy. Bıliktiń baǵalaýynsha, jalpy sherýler iri oqıǵalarsyz ótti.

Premer-mınıstr Sebastıan Lekornıý Ulttyq assambleıada sóılegen sózinde tártipsizdikter bastalǵaly keminde 215 jasóspirim men 85 mektep qyzmetkeri zardap shekkenin habarlady. Ol muny «sońǵy onjyldyqtardaǵy mektep júıesi úshin eń aýyr saldar» dep atady.

Іshki ister mınıstri Loran Nýnes buǵan deıin 700-den astam polıtsııa qyzmetkeriniń jaraqat alǵanyn aıtqan. Qyrkúıek aıynyń sońynan beri 6,5 myńnan astam adam ustaldy. Olardyń basym kópshiligi kámeletke tolmaǵandar.

Bilim mınıstri Edýar Jeffre 24 lıtseıdiń órtengenin nemese qatty búlingenin jáne olardyń birneshe apta boıy ashylmaıtynyn habarlady. Osyǵan baılanysty shamamen 30 myń lıtseı oqýshysy dástúrli formattaǵy sabaqtardan aıyryldy.

Lans qalasynda bolǵan oqıǵa erekshe rezonans týdyrdy. 15 jastaǵy jasóspirim jaryq-dybystyq granatamen baılanysqannan keıin qolynan aıyryldy. Tergeý barysynda onyń granatany ózi alǵan-almaǵany anyqtalyp jatyr.

Týr qalasynda oqýshy kózinen kózden jas aǵyzatyn gaz ballonynan jaraqat alǵan.

Lanstaǵy oqıǵadan keıin Nýnes ASSD úlgisindegi granatalar endi lıtseı oqýshylarynyń mobılızatsııasy kezinde qoldanylmaıtynyn málimdedi. Quqyq qorǵaý uıymdary, sonyń ishinde Amnesty International, kámeletke tolmaǵandarǵa qatysty kúsh qoldanýdy synǵa aldy.

6 qazan keshke Prezıdent Emmanıýel Makron Elıseı saraıynda Premer-mınıstr Sebastıan Lekornıý, Іshki ister mınıstri Loran Nýnes jáne Bilim mınıstri Edýar Jeffreni shuǵyl keńeske jınady.

Frantsııa prezıdenti narazylyq qozǵalysyna qatysty kópshilik aldynda derlik pikir bildirmeı otyr. Ol shetelden jasaǵan málimdemesinde jastardyń daýlary men alańdaýshylyǵy zorlyq-zombylyqty aqtamaıtynyn aıtty.

Sebastıan Lekornıý 7-9 qazan aralyǵynda oqý oryndaryndaǵy sabaqtardy ishinara toqtatýdy usyndy. Bilim mınıstrligi buǵan deıin lıtseı oqýshylary shaǵymdaryn jasyryn túrde joldaı alatyn arnaıy alań ashqan.

Úkimetke aı sońyna deıin oqý ǵımarattarynyń jaǵdaıy, sabaq kestesi jáne Parcoursup platformasyndaǵy oqýǵa túsý júıesi boıynsha jol kartasyn ázirleý tapsyryldy.

Alaıda kásipodaq jetekshileri bul sharalardy jetkiliksiz dep baǵalady. Uıymdardyń bir bóligi shamamen 10 mlrd eýro kóleminde shuǵyl paket qabyldaýdy talap etip otyr. Usynystar qatarynda muǵalimder jaldaý, ǵımarattardy jóndeý, synyptardaǵy oqýshy sanyn azaıtý jáne Parcoursup júıesin qaıta qaraý bar.

Olar 8 qazanda narazylyqtyń «tórtinshi aktisin» ótkizýge shaqyrdy. 7 qazan, sársenbi kúni Parıjdegi birqatar lıtseıdiń, sonyń ishinde Hélène-Boucher jáne Voltaire oqý oryndarynyń, sondaı-aq Sciences Po kireberisindegi blokadalar saqtaldy.

Joǵary synyp oqýshylarynyń qozǵalysy 17-21 qyrkúıek aralyǵynda Parıj mańyndaǵy Kreteı qalasyndaǵy Sent-Ekzıýperı lıtseıinde bastalyp, keıin Il-de-Frans óńirinen tys jerlerge de tarady.

15-18 jastaǵy oqýshylar muǵalim jetispeýshiligin joıýdy, synyptardaǵy oqýshy sanyn azaıtýdy, tozyǵy jetken ǵımarattardy jóndeýdi, oqý kúnin jeńildetýdi jáne Parcoursup júıesin qaıta qaraýdy talap etip otyr.

Le Figaro basylymy úshin Odoxa júrgizgen saýalnamaǵa sáıkes, bul qozǵalysty frantsýzdardyń shamamen 62%-y qoldaıdy.

Narazylyqtar qatań bıýdjet ázirlenip jatqan jáne 2027 jylǵy prezıdent saılaýyna birneshe aı qalǵan kezeńde ótip jatyr. Emmanıýel Makronnyń ekinshi prezıdenttik merzimi aıaqtalýǵa jaqyn. Ol qaıta saılaýǵa túse almaıdy.

Osyǵan deıin Frantsııadaǵy oqýshylardyń jappaı narazylyǵyna baılanysty Makron shuǵyl keńes ótkizgeni týraly jazdyq.