Frantsııada joǵary synyp oqýshylarynyń narazylyǵy kúsheıe tústi
ASTANA. KAZINFORM – Frantsııada joǵary synyp oqýshylarynyń narazylyǵy jalǵasyp jatyr. Olar mektepterdiń kireberisin jaýyp, muǵalim jetispeýshiligin joıýdy, bilim salasyna bólinetin qarjyny kóbeıtýdi jáne oqý jaǵdaıyn jaqsartýdy talap etip jatyr, dep habarlaıdy Kazinform agenttiginiń menshikti tilshisi.
Beısenbi kúni joǵary synyp oqýshylary men stýdentterdiń kásipodaqtary narazylyqtyń «ekinshi kezeńin» jarııalady. Bastamashylar mektep kireberisterin bógegen jekelegen aktsııalardy stýdenttermen birlesip, búkil el kólemindegi uıymdasqan naýqanǵa aınaldyrmaq.
Aktsııany ótkizýge Lıtseı oqýshylary odaǵynyń (USL) tóraǵasy Rııad Ranı men Stýdentter odaǵynyń (Union étudiante) bas hatshysy Eloız Lefevr-Mılon uıytqy boldy.
Parıjde ótken birlesken baspasóz máslıhatynda olar 1 jáne 6 qazanda ótetin aktsııalarǵa barlyq kásipodaq, qaýymdastyq pen saıası uıymdy qatysýǵa shaqyrdy.
Basty talap ózgergen joq: «lıtseıler men ýnıversıtetterdi jappaı qarjylandyrý». Al úshinshi bir stýdenttik uıym – UNEF joǵary oqý oryndaryndaǵy oryndardyń qysqarýyna jáne APL turǵyn úı járdemaqysynyń toqtatylýyna qarsylyq bildirip, stýdentterdi kóshege shyǵýǵa shaqyrdy.
Ótken aptadan beri narazylyqqa shyqqandar muǵalim jetispeýshiligine, synyptardyń shamadan tys tolýyna, tozyǵy jetken ǵımarattarǵa jáne Parcoursup júıesine shaǵymdandy. Sársenbige qaraı bul qozǵalys 356 oqý ornyn qamtydy.
Uıymdastyrýshylar ekinshi kezeńde aktsııa aýqymyn keńeıtip, ýnıversıtet stýdentterin de tartýdy kózdep otyr. Úkimet lıtseı oqýshylarymen keńesý platformasyn jarııalaǵanymen, narazylyq bildirýshiler qysymdy jalǵastyrmaq.
Al ótken táýlikte qozǵalysqa qatysqan 625 adam ustalyp, qaýipsizdik kúshteriniń 83 qyzmetkeri jaraqat aldy. Frantsııa premer-mınıstri Lekornıý lıtseı oqýshylarynyń narazylyǵyn odan ári ýshyqtyrý «jaýapsyzdyq» ekenin eskertken edi.
Buǵan deıin Frantsııada oqýshylardyń narazylyq aktsııasynda 400-den astam adam ustalǵany habarlanǵan bolatyn.
