Frantsııada jyldar boıy zorlyq-zombylyq qurbany bolǵan áıeldi qoldaý aktsııalary ótti

ASTANA. KAZINFORM – Demalys kúnderi Frantsııanyń iri qalalarynda áıelderge qatysty zorlyq-zombylyqpen kúrestiń sımvolyna aınalǵan Jızel Pelıkony qoldaýǵa arnalǵan mıtıngiler ótti. 

Frantsııany dúr silkindirgen seksýaldy qylmystar serııasyna baılanysty 50-den astam er adam sottalyp jatyr: Jızel Pelıkonyń kúıeýi ony anksıolıtıktermen esinen tandyryp, beıtanys adamdardyń zorlaýyna jol bergen. 

Áıel sot jabyq esik jaǵdaıynda ótpeýin talap etti.

«Erligińiz úshin rahmet, qurban bolǵandar emes, zorlaýshylar uıalýy kerek» degen uranmen 72 jastaǵy Jızel Pelıkony qoldaý úshin kóshe mıtıngileri ótti. 

Polıtsııanyń málimetinshe, senbi kúni tústen keıin Parıjdegi Respýblıka alańyna Jızel Pelıkonyń batyldyǵyna tańdanysyn bildirý úshin 3 500 adam jınaldy.

Demonstratsııalar Marsel, Bordo, Strasbýrg, Nant jáne Renn qalalarynda da ótti. 

Jızel Pelıko jýrnalısterge onyń tolyq aty-jónin jarııalaýǵa, al sotqa beıtanys adamdar ony es-tússiz kúıde zorlaǵan kezde kúıeýi túsirgen vıdeolardy kórsetýge ruqsat berdi. 

Zorlady degen 51 adamǵa, onyń ishinde burynǵy jubaıy men qylmystyq «jeli» uıymdastyrýshysyna qarsy aıyp taǵyldy. 

5 qyrkúıekte Jızel Pelıko polıtsııa ony tórt jyl buryn bolǵan oqıǵa týraly aıtý úshin polıtsııa bólimshesine shaqyrǵannan beri ne bastan keshkeni týraly alǵash ret kópshilik aldynda aıtty.