Frantsııada jyldamdyqty asyrǵandar túrmege qamalýy múmkin
ASTANA. KAZINFORM — Frantsııada jyldamdyqty shamadan tys asyrǵan júrgizýshilerge qatysty qatań jaza 29 jeltoqsannan keıin kúshine enedi. Bul týraly Kazinform agenttiginiń menshikti tilshisi habarlady.
Frantsýz baspasózi túsindirgendeı, mundaı quqyq buzýshylyq úshin endi «sottylyǵy bar» degen belgi tirkeledi. Bul norma Frantsııanyń resmı zańdary men jarlyqtary jarııalanatyn Journal officiel-de («Resmı jýrnalda») kórsetilgen.
29 jeltoqsannan bastap ruqsat etilgen jyldamdyq sheginen 50 km/saǵ jáne odan da kóp asyrǵandar úsh aıǵa deıin bas bostandyǵynan aıyrylyp, 3 750 eýro kóleminde aıyppul tóleıdi.
Habarlamada bul jarlyq 2025 jylǵy 9 shildede qabyldanǵany jáne «jol qozǵalysy erejelerin buzýmen kúresýge baǵyttalǵan» zań negizinde engizilgeni aıtylǵan.
Buǵan deıin mundaı jyldamdyqty asyrǵandar 5-synyptaǵy (eń qatań) aıyppulmen jazalanatyn. Tek qaıtalanǵan jaǵdaıda ǵana júrgizýshi kýáliginen aıyrylatyn.
Frantsııanyń Jol qaýipsizdigi departamentiniń málimetinshe, ruqsat etilgen shekten aıtarlyqtaı asqan jyldamdyq «asa qaýipti minez-qulyq bolyp sanalady jáne jol-kólik oqıǵasy kezinde aýyr saldarǵa ákelýi múmkin».
— Bul asa aýyr jyldamdyq rejımin buzýdy qylmys retinde jiktep, qatań quqyqtyq sharalar qoldaný arqyly biz anyq belgi berip otyrmyz: joldaǵy zorlyq-zombylyqqa endi jol joq, — dedi Frantsııa ishki ister mınıstrliginiń ókili Marı-Per Vedrenn.
Málimdemede sondaı-aq shamadan tys jyldamdyq reaktsııa ýaqytyn qysqartyp, tejeý jolyn uzartyp, kólikti basqarýdy qıyndatyp, soqtyǵys kezindegi soqqy kúshin arttyratyny aıtylǵan.
2024 jyly Jol qaýipsizdigi qyzmeti 50 km/saǵ jáne odan joǵary jyldamdyqty asyrǵan 63 217 jaǵdaıdy tirkegen. Bul kórsetkish 2017 jylmen salystyrǵanda 69 paıyzǵa artqan.
Jyldamdyqty asyrǵan júrgizýshilerdiń kólikteri tárkilenip, júrgizýshi kýáligi úsh jylǵa deıin berilmeýi múmkin.
Sondaı-aq olarǵa bes jyl nemese odan da uzaq merzimge belgili bir jerústi kólik quraldaryn basqarýǵa tyıym salynyp, jol qaýipsizdigi boıynsha arnaıy oqytý kýrsynan ótý mindetteledi.
Budan buryn Frantsııada polıtsııa adamdardy pyshaqpen qorqytqan er adamǵa oq atqanyn jazǵanbyz.