Frantsııada jappaı narazylyqqa baılanysty 400-den astam lıtseı jabylady
ASTANA. KAZINFORM — Frantsııada jappaı narazylyq pen tártipsizdikke baılanysty 2 qazanda 400-den astam lıtseıde sabaq onlaın formatqa aýystyrylady. Bul týraly Ulttyq bilim mınıstri Edýar Jeffre France 2 telearnasynyń efırine silteme jasap, TASS habarlady.
— Erteń 400-den sál astam oqý orny jabylady. Ondaǵy sabaqtar qashyqtan ótkiziledi, — dedi mınıstr.
Ol narazylyq bildirýshilerdiń zorlyq-zombylyq áreketterin jáne memlekettik mekemelerdi qıratýǵa baǵyttalǵan áreketterdi aıyptady.
Mınıstrdiń aıtýynsha, apta basynan beri ótken narazylyq aktsııalary kezinde 170 joǵary synyp oqýshysy men 65 bilim berý uıymynyń qyzmetkeri zardap shekken.
Edýar Jeffre oqýshylar qozǵalysynyń tym agressıvti toptardyń yqpalynda qalǵanyna ókinish bildirip, kásipodaqtarmen jáne stýdenttik uıymdarmen dıalogty jalǵastyrýǵa nıetti ekenin jetkizdi.
Joǵary synyp oqýshylarynyń narazylyq aktsııalary ótken aptada Frantsııa astanasy ornalasqan Il-de-Frans óńirinde bastalyp, qazir búkil elge taralǵan. Narazylyq bildirýshiler oqý kestesiniń shamadan tys tyǵyzdyǵyna, muǵalimderdiń tapshylyǵyna jáne bilim berý júıesindegi ózge de máselelerge qarsylyq bildirgen.
Keıbir aımaqtarda beıbit aktsııalar tártipsizdikke ulasyp, polıtsııamen qaqtyǵystar bolǵan.
Sońǵy málimetterge sáıkes, tártipsizdikterge qatysqany úshin 2 myńǵa jýyq adam ustalǵan. Olardyń 1,8 myńy qamaýǵa alynǵan.
