Frantsııada jappaı narazylyq qaıta kúsheıdi: 448 adam ustaldy
ASTANA. KAZINFORM – Frantsııada 5 qarashada ótken jappaı narazylyq aktsııalaryna kásipodaqtardyń málimetinshe, 1,6 mln adam qatysty. Al bılik sherýge shyqqandardyń sanyn shamamen 600 myń adam dep baǵalap otyr, dep habarlaıdy DW.
El kóleminde ótken aktsııalar barysynda keminde 448 adam ustalyp, 53 polıtsııa qyzmetkeri jaraqat aldy.
Parıjde narazylyq sherýi negizinen beıbit ótti. On myńdaǵan adam Respýblıka alańyna jınalyp, odan keıin Ult alańyna deıin júrip ótti. Uıymdastyrýshylardyń baǵalaýynsha, el astanasyndaǵy sherýge 350 myńǵa deıin adam qatysqan.
Narazylyq aktsııasyna belgili saıasatkerler Jan-Lıýk Melanshon, Marın Tondele jáne Rafael Glıýksmann da qosyldy.
Sherýlerge baılanysty Eıfel munarasy jabylyp, kóptegen óńirlik poıyzdardyń qozǵalysy toqtatyldy.
– Jańa narazylyq aktsııalaryn kásipodaqtar uıymdastyrdy. Olarǵa mektep oqýshylary men stýdentterdiń uıymdary, sondaı-aq «sary jıletter» qozǵalysy qosyldy. Eldegi orta mektepterdiń shamamen úshten biri jabyldy, olardyń kópshiliginiń jumysyn oqýshylar buǵattady. Memlekettik sektor qyzmetkerleriniń 10 paıyzǵa jýyǵy ereýil jarııalap, jumysqa shyqqan joq, – delingen aqparatta.
Birqatar qalada narazylyq bildirýshiler men polıtsııa arasynda qaqtyǵystar boldy. Atap aıtqanda, Marsel, Lıon, Bordo, Strasbýrg, Nant, Po, Orlean, Renn jáne Týlýza qalalarynda tártipsizdikter tirkeldi.
El boıynsha 86 órt qoıý deregi anyqtalǵan. Habarlamada mundaı áreketterge radıkaldy jáne ásire solshyl toptardyń qatysy bar ekeni aıtylǵan.
Frantsııa premer-mınıstri Sebasten Lekornıý narazylyq bildirýshilerdiń talaptaryn talqylaý úshin 9 qarashada arnaıy konferentsııa ótkiziletinin málimdedi.
Aıta keteıik, buǵan deıin Frantsııada 5 qarashaǵa josparlanǵan jappaı ereýilge bes iri kásipodaq uıymy qatysatyny habarlanǵan bolatyn. Olar 2027 jylǵy bıýdjetke, memlekettik qyzmetkerlerdiń jalaqysyna qatysty shekteýlerge jáne halyqtyń satyp alý qabiletiniń tómendeýine narazylyq bildirgen.
