Frantsııada janarmaı baǵasy rekord jańartty
ASTANA. KAZINFORM – Frantsııada janarmaı baǵasynyń kúrt ósýi halyqtyń narazylyǵyn kúsheıtti. Sońǵy aptalarda balyqshylar munaı bazalary men porttarǵa kireberisterdi jaýyp, fermerler qymbatshylyqqa qarsy narazylyq aktsııalaryn ótkizdi, dep habarlaıdy Euronews.
Frantsııada dızel otynynyń lıtri 2,41 eýroǵa deıin qymbattap, jańa rekord ornatty. Elde eń kóp satylatyn SP95-E10 benzıniniń baǵasy lıtrine 2,17 eýrodan asyp, 2022 jylǵy eń joǵary kórsetkishten joǵarylady. Al SP98 benzıniniń ortasha baǵasy 2,28 eýrodan asty.
Baǵanyń ósýine baılanysty Frantsııa úkimeti janarmaı qymbatshylyǵynan eń kóp zardap shekken otbasylarǵa arnalǵan ataýly ótemaqy sharalaryn keńeıtip, onyń merzimin uzartatynyn jarııalady. Jańa qoldaý paketine 450 mln eýro bólinedi. Osylaısha janarmaı baǵasynyń ósýin jumsartýǵa baǵyttalǵan sharalardyń jalpy kólemi 1,4 mlrd eýroǵa jetpek.
– Janarmaıǵa salynatyn salyq memleketke aıtarlyqtaı kiris ákeledi, biraq sonymen birge onyń túpkilikti baǵasyn edáýir arttyrady, – dedi Parıj Dofın ýnıversıtetiniń ekonomıka professory Anna Krıtı.
Frantsııada janarmaıǵa salynatyn negizgi eki salyq bar. Onyń biri – energetıkalyq ónimderdi tutynýǵa salynatyn TICPE aktsızi, ekinshisi – shamamen 20% mólsherindegi qosylǵan qun salyǵy. QQS janarmaı qunyna TICPE qosylǵannan keıin esepteledi.
Sarapshylardyń pikirinshe, Frantsııanyń dızel otyny ımportyna táýeldiligi de baǵanyń syrtqy faktorlarǵa sezimtaldyǵyn arttyrady. Elde dızelmen júretin kólikter kóp, bul otyn túrin shaǵyn jáne orta bıznes, kommertsııalyq tasymal men ónerkásip te keńinen paıdalanady.
Qazirgi janarmaı baǵasy ınflıatsııany esepke alǵanda, 2018 jyly «sary jıletter» qozǵalysynyń jappaı narazylyǵyna túrtki bolǵan deńgeıden de asyp ketken.
Aıta keteıik, Sırııada janarmaı baǵasynyń ósýine qarsy narazylyq jalǵasyp jatyr.
