Frantsııada túrme qyzmetkerleri narazylyqqa shyqty

ASTANA. KAZINFORM – Frantsııada penıtentsıarlyq mekemeler qyzmetkerleri túrmelerdiń shamadan tys tolyp ketýi men qyzmetkerler tapshylyǵyna qarsy narazylyq aktsııalaryn bastady, dep habarlaıdy Euronews.

Kásipodaq ókilderiniń málimetinshe, eldegi kameralardyń tolymdylyǵy belgilengen normadan asyp ketken. Osyǵan baılanysty 27 sáýir, dúısenbi kúni O-de-Frans óńirindegi 17 túrmeniń 14-inde narazylyq aktsııalary ótti.

Narazylyq barysynda túrme qaqpalary buǵattalyp, tutqyndarmen kezdesýler men olardy tasymaldaý ýaqytsha toqtatylǵan. Jalpy alǵanda, aktsııaǵa eldegi 190 mekemeniń 80-i qatysyp jatyr.

– Qazirgi jaǵdaı tótenshe sharalardy talap etedi. Túrmelerdegi adam sany shekten asyp, júıege aýyr salmaq túsirip otyr, – dep málimdedi kásipodaq ókilderi.

Olardyń aıtýynsha, naýryz aıyndaǵy derek boıynsha Frantsııadaǵy túrmelerdiń tolymdylyǵy 137,5%-ǵa jetken. Jazǵy ystyq bastalǵanda jaǵdaı odan ári kúrdelene túsýi múmkin.

Kásipodaq bılikten túrmelerdi «jeńildetýge» baǵyttalǵan shuǵyl jospar qabyldaýdy talap etýde. Al Frantsııa úkimeti bul máseleni sheshý úshin zań jobasyn ázirlep jatyr, alaıda ony Ulttyq jınalysqa engizý merzimi ázirge belgisiz.

Sonymen qatar Ádilet mınıstrligi qosymsha 3 myń oryn ashýdy josparlap otyr. Onyń jartysyn 2027 jylǵa deıin iske qosý kózdelgen.

Aıta keteıik, buǵan deıin Parıjde avtobýs júrgizýshileri de narazylyq aktsııasyna shyqqan bolatyn.