Frantsııada toksın mólsheri normadan asqan 41 tonna túrik injiri tárkilendi
ASTANA. KAZINFORM — Marsel keden qyzmeti Túrkııadan ákelingen 41 tonna keptirilgen injirdi tárkiledi. Zerthanalyq tekseris barysynda ohratoksın A deńgeıi anyqtalyp, keıbir partııalarda ol Eýroodaq ruqsat etken normadan toǵyz esege deıin asyp ketken, dep habarlaıdy Kazinformniń Ankaradaǵy menshikti tilshisi.
Frantsııanyń DGDDI (Keden jáne janama salyqtar jónindegi bas basqarmasy) málimetinshe, talapqa saı kelmeıtin 41 tonna túrik keptirilgen injiri sanıtarlyq normalardy buzǵan. Bul týraly túrkııalyq ekonomimanset.com ınternet-basylymy jazdy.
Tekserý jyl basynda Marsel mańyndaǵy Vıtrol qalasyndaǵy qoımada júrgizilgen. Salmaǵy 10 tonnadan asatyn alǵashqy partııa úlgilerinen zeń sańyraýqulaqtarynan túziletin mıkotoksın — ohratoksın A anyqtalyp, onyń mólsheri EO normasynan bes ese joǵary bolǵan. Keıin Túrkııadan jetkizilgen taǵy tórt partııa tekserilip, olardyń birinde toksın deńgeıi ruqsat etilgen shekten toǵyz ese asyp ketkeni belgili boldy.
Ohratoksın A keıbir zeń túrleri — Aspergillus jáne Penicillium arqyly túziledi. Ol astyq ónimderinde, kofe, júzim jáne keptirilgen jemisterde durys saqtalmaǵan jáne keptirilmegen jaǵdaıda jınalýy múmkin. Bul zat yqtımal kantserogen retinde sanalady jáne adam densaýlyǵyna qaýip tóndiredi.
Tárkilengen ónim joıylǵan nemese keri Túrkııaǵa qaıtarylǵan. Sol operatsııa aıasynda Gvıneıadan ákelingen 15 tonna kúnjit te tárkilengen, onda jándikter men zalaldaný belgileri anyqtalǵan.
DGDDI dereginshe, 2025 jyly Marsel men Por-de-Býk portynda 659 sanıtarlyq tekserý júrgizilip, olardyń shamamen 16%-ynda zań buzý anyqtalǵan.
Frantsııa túrik injiri úshin negizgi eksporttyq naryqtardyń biri bolyp qala beredi. Egeı eksporttaýshylar qaýymdastyǵynyń málimetine sáıkes, 2024–2025 maýsymynda Túrkııanyń keptirilgen injir eksporty alǵash ret 300 mln dollardan asqan. Eń iri satyp alýshy — AQSh, ekinshi orynda — Frantsııa, odan keıin Germanııa tur.
Buǵan deıin Túrkııadan Sırııaǵa un eksporty 110%-ǵa artqany habarlanǵan edi. Qýańshylyq, úsik jáne bıdaı ımportyna qatysty retteýdegi ózgeristerge qaramastan, Sırııaǵa túrik unynyń jetkizilimi 650 myń tonnaǵa jetken.