Frantsııada temirjoldaǵy vandalızm saldarynan poıyzdar toqtatyldy

ASTANA. KAZINFORM — Frantsııada Lıon–Avınon baǵytyndaǵy joǵary jyldamdyqty poıyzdardyń reısteri sıgnaldyq kabelderdiń qasaqana órtenýine baılanysty toqtatyldy, dep habarlaıdy Anadoly.

Frantsııanyń temirjol kompanııasy SNCF óz saıtynda habarlaǵandaı, tańerteńnen bastap Lıon–Avınon baǵyty boıynsha poıyz qozǵalysynda irkilister men reısterdiń toqtatylýy tirkelgen. Buǵan sıgnaldyq kabelde shyqqan órt sebep bolǵan.

SNCF málimetinshe, órt «vandalızm áreketiniń» saldarynan shyqqan. Qazirgi ýaqytta zaqymdanǵan kabelderdi qalpyna keltirý boıynsha jóndeý jumystary júrgizilip jatyr.

Kompanııa sondaı-aq poıyz qozǵalysynyń ońtústik-shyǵys baǵytynda, sonyń ishinde Parıjge baratyn baǵyttarda eleýli keshigýler bolatynyn eskertti.

Frantsııanyń kólik mınıstri Fılıpp Tabaro amerıkandyq X platformasyndaǵy jazbasynda Valans stantsııasynyń ońtústigindegi sıgnaldyq kabelderdiń «qasaqana órtelgenin» málimdep, bul «vandalızm áreketin» qabyldaýǵa bolmaıtynyn aıtty.

Ol SNCF qyzmetkerleri poıyz qozǵalysyn qalpyna keltirý úshin jumyldyrylǵanyn atap ótip, «buzaqylyq áreketke» qatysy bar adamdardyń qatań jazalanatynyn jetkizdi.

Aıta ketelik Lývrdaǵy zergerlik buıymdar ýaqytsha Frantsııa bankiniń qoımasyna kóshiriletini týraly jazǵan edik.