Frantsııada tártipsizdik qaýpine baılanysty 70 myń polıtseı jumyldyrylady
ASTANA. KAZINFORM — Frantsııa bıligi jappaı narazylyq aktsııalarynyń jańa tolqynyna daıyndalyp jatyr. Elde tártipsizdik qaýpi joǵary bolǵandyqtan, kóshelerge shamamen 70 myń polıtseı shyǵarý josparlanyp otyr. Frantsııanyń Іshki ister mınıstrligi sherýler Helloýın qarsańynda ótetindikten, jaǵdaıdyń ýshyǵý qaýpi bar ekenin eskertti, dep habarlaıdy Kazinform Euronews-ke silteme jasap.
Frantsııa bıligi osy senbide, Helloýın qarsańynda ótetin jappaı narazylyq aktsııalarynyń «úshinshi kezeńine» daıyndalyp jatyr. Eldiń Іshki ister mınıstrligine jaqyn derekkóz qoǵamdyq tártiptiń buzylý qaýpi óte joǵary ekenin eskertken.
17 qazanda bolǵan jappaı tártipsizdikterdiń qaıtalanýyna jol bermeý úshin el aýmaǵynda shamamen 70 myń polıtseı jumyldyrylmaq.
Kásipodaqtar, stýdentter men «sary keýdesheliler» qozǵalysynyń qatysýshylary úshinshi apta qatarynan senbi kúni narazylyq aktsııalaryn ótkizbek. Olar mektepterdegi oqý jaǵdaıyna jáne ómir súrý qunynyń qymbattaýyna qarsy.
Frantsııa úkimeti dúısenbi kúni stýdentterdiń talaptaryn eskerýge baǵyttalǵan birqatar sharany usynǵanyna qaramastan, narazylyq bildirýshiler kóshege shyǵýǵa nıetti. Alaıda kásipodaqtar bul sharalardy jetkiliksiz dep baǵalady.
Eske salaıyq, buǵan deıin 28 qazanda Frantsııa Senaty narazylyq aktsııalary barysynda múlikke zalal keltirilse, sol sherýge qatysqandarǵa yntymaqty azamattyq jaýapkershilikti belgileıtin zań jobasyn birinshi oqylymda maquldaǵanyn habarlaǵan edik.
