Frantsııada sýpermarketterge kıbershabýyl jasalyp, mıllıondaǵan eýronyń azyq-túligi búlindi
ASTANA. KAZINFORM – Frantsııada júzdegen sýpermarket kıbershabýylǵa ushyrap, tońazytqyshtar men muzdatqyshtardyń temperatýrasy kúrt kóterilgen. Saldarynan mıllıondaǵan eýro turatyn azyq-túlik jaramsyz bolyp qaldy, dep habarlaıdy BBC.
Hakerler saýda oryndaryndaǵy tońazytqysh jabdyqtarynyń temperatýrasyn retteıtin baǵdarlamalyq jasaqtamany baqylaýǵa alǵan. Zardap shekken saýda jelileriniń biriniń málimetinshe, keıbir tońazytqyshtardyń temperatýrasy tún ishinde Tselsıı boıynsha 50 gradýsqa deıin kóterilgen.
Coopérative U kompanııasynyń bas dırektory Domınık Shelshe birneshe sýpermarketke jasalǵan shabýyldy buryn-sońdy bolmaǵan asa aýyr oqıǵa dep baǵalady.
Kıbershabýyl Coopérative U jelisiniń 100-den astam sýpermarketine, sondaı-aq Intermarché jáne oǵan tıesili Netto brendiniń 180 dúkenine áser etken. Intermarché ókiliniń aıtýynsha, osyndaı shabýyldardyń aldyn alý úshin taǵy 100 dúken shuǵyl túrde ınternetten ajyratylǵan.
Carrefour kompanııasy ózine tıesili 6 myń dúkenniń 80-inde tońazytqyshtardy basqarý júıesi buzylǵanyn habarlady. Al Monoprix jelisinde 400-den astam dúkenniń 5 paıyzy kıbershabýyldan zardap shekken.
Qaýipsizdigine kepildik berý múmkin bolmaǵan azyq-túlik ónimderi saýdadan alyndy.
Intermarché jáne Netto jelilerine ıelik etetin Mousquetaires toby BBC-ge bergen málimdemesinde dúısenbi kúni tústen keıin de keıbir tońazytqyshtar men muzdatqysh vıtrınalary jumys istemeı turǵanyn jetkizdi.
Kompanııa ókilderi dúkenderdiń barlyq qajetti saqtyq sharalaryn qabyldap, atalǵan tońazytqyshtardaǵy ónimderdi alyp tastaǵanyn atap ótti. Qyzmetkerler sórelerdi múmkindiginshe tezirek qaıta toltyrý úshin jumys istep jatyr.
Tergeý málimetinshe, kıbershabýyldyń negizgi nysanasy Danııanyń Danfoss ınjenerlik kompanııasy ázirlegen baǵdarlamalyq jasaqtama bolǵan.
Bul júıe saýda jelilerine tońazytqysh jabdyqtaryn qashyqtan basqarýǵa múmkindik beredi.
Ádette sýpermarketterdegi muzdatqysh kameralar túnde qysqa merzimdi jibitý kezeńinen ótedi. Osy ýaqytta olardyń temperatýrasy azdap kóteriledi.
Alaıda hakerler jabdyqtardyń qyzýyn kúsheıtip, joǵary temperatýranyń uzaq ýaqyt saqtalýyna yqpal etken.
Kıbershabýyldyń tolyq aýqymy ázirge anyqtalǵan joq. Degenmen jekelegen saýda jelileriniń málimetteri Frantsııadaǵy shamamen 15 myń sýpermarkettiń 400-ge jýyǵy zardap shekkenin kórsetedi.
Frantsııa prokýratýrasy kıberqylmysqa qatysty jeke tergeý bastady.
Parıj prokýratýrasy bul oqıǵany el aýmaǵyndaǵy birneshe iri azyq-túlik saýda jelisiniń tońazytqysh jabdyqtaryna jasalǵan aýqymdy kıbershabýyl dep sıpattady.
Eýropalyq komıssııanyń aýyl sharýashylyǵy jáne azyq-túlik máseleleri jónindegi komıssary Krıstof Hansen X áleýmettik jelisinde shabýyldy aıyptady.
– Azyq-túlik qaýipsizdigi barlyq deńgeıde erekshe nazar aýdarýdy talap etedi. Óıtkeni azyq-túlikti qarýǵa aınaldyrý shyndyqqa aınaldy, – dep jazdy ol.
Coopérative U kompanııasynyń bas dırektory Domınık Shelshe de X jelisinde qyzmetkerlerdiń jaǵdaıdy qalpyna keltirýge tolyq jumyldyrylǵanyn málimdedi.
Onyń aıtýynsha, kompanııa mamandary tońazytqysh jabdyqtaryna qyzmet kórsetetin sarapshylarmen birlesip, júıelerdiń qalypty jumysyn múmkindiginshe tezirek qalpyna keltirýge kúsh salyp jatyr.
Sondaı-aq ol kıbershabýylǵa qatysty jan-jaqty tergeý júrgizýge shaqyrdy.
Aıta keteıik, buǵan deıin Frantsııada salyq qyzmetiniń aqparattyq júıesine jasalǵan kıbershabýyl saldarynan shamamen 678 myń jeke tulǵa men kompanııanyń derekteri zardap shekkeni habarlanǵan bolatyn.
