Frantsııada stýdenttiń qazasy saılaý qarsańynda solshyldarǵa qysymdy kúsheıtti

ASTANA. KAZINFORM – Lıon qalasynda stýdent Kantan Deranktiń qaza tabýy Frantsııadaǵy saıası ahýaldy shıelenistirip, ásirese eldegi radıkal solshyl kúshterge qatysty synnyń kúsheıýine sebep boldy. Bul týraly BBC habarlady.

22 jastaǵy Kantan Derank 12 aqpanda ýnıversıtet janynda ótken shaǵyn narazylyq aktsııasynan keıin shabýylǵa ushyraǵan. Ol ýltraońshyl femınıstik top uıymdastyrǵan is-sharanyń qaýipsizdigin qamtamasyz etip júrgen. Áleýmettik jelilerde taraǵan beınejazbada betperde kıgen jastardyń ony jerge qulatqannan keıin birneshe ret tepkilep, soqqyǵa jyqqany kórinedi.

Basynan alǵan aýyr jaraqat saldarynan stýdent kóz jumǵan.

Oqıǵadan keıin Frantsııadaǵy solshyl radıkaldyq baǵyttaǵy «La France Insoumise» partııasy men onyń kóshbasshysy Jan-Lıýk Melanshonǵa qatysty syn kúsheıdi. Ulttyq jınalysta bul partııa shamamen 70 depýtatpen usynylǵan.

Qylmysqa qatysy bar degen kúdikpen jeti adamǵa aıyp taǵylǵan. Tergeý málimetinshe, olar buǵan deıin «La Jeune Garde» uıymynyń músheleri nemese jaqtastary bolǵan. Bul uıym ótken jyly tyıym salynǵanǵa deıin «La France Insoumise» partııasynyń is-sharalaryn kúzetýmen aınalysqan.

Kúdiktilerdiń biri Jak-Elı Favro «La France Insoumise» depýtaty Rafael Arnonyń parlamenttik kómekshisi bolǵan. «La Jeune Garde» uıymyn 2018 jyly dál osy Arno qurǵan.

Favroǵa «óltirýge ıtermeleý arqyly sybaılastyq jasaý» baby boıynsha aıyp taǵylǵan. Tergeý nusqasyna sáıkes, ol ólimge ákelgen soqqylardy tikeleı jasamaǵan.

Oqıǵa Frantsııadaǵy saılaý naýqany qarsańynda radıkal saıası kúshterdiń qoǵamdaǵy orny men jaýapkershiligine qatysty qyzý pikirtalas týdyrdy.

Aıta keteıik, Frantsııada oppozıtsııanyń úkimetke senimsizdik votýmyn jarııalaýy sátsiz aıaqtaldy.